హైదరాబాద్ చార్మినార్ పరిధిలో ఆదివారం ఘోర అగ్నిప్రమాదం జరిగింది. ఈ ఘటనలో తొలుత ఎనిమిది మంది దుర్మరణం చెందినట్లు తెలియగా, తాజా సమాచారం ప్రకారం చనిపోయినవారి సంఖ్య పదహారుకు పెరిగింది. మరికొందరు తీవ్రంగా గాయపడ్డారు. చార్మినార్ పరిధిలోని గుల్జార్ హౌజ్ లో ఈ ఘోర ప్రమాదం జరిగింది. ప్రాణాలు కోల్పోయినవారిలో ఇద్దరు చిన్నారులు, నలుగురు మహిళలు ఉన్నారు. మంటలు చెలరేగి పొగ కమ్ముకోవడంతో దాదాపు 16 మంది స్పృహ కోల్పోయారు. ఈ దుర్ఘటనలో అభిషేక్ మోదీ, రాజేంద్రకుమార్, మున్నీబాయి, సుమిత్ర, ఆరుషి జైన్, శీతల్ జైన్, ఇరాజ్, అర్షాదీ గుప్తా, హర్షాలీ గుప్తా, రజనీ అగర్వాల్, అన్య మోదీ, పంకజ్ మోదీ, వర్ష మోదీ, ఇద్దక్కి మోదీ, రిషబ్, ప్రథమ్ అగర్వాల్, ప్రామ్షీ అగర్వాల్ అనే వ్యక్తులు ప్రాణాలు కోల్పోయినట్లు సమాచారం.
ఘటనలో తీవ్రంగా గాయపడినవారిని ఉస్మానియా, యశోద, డీఆర్డీవో, అపోలో తదితర ఆసుపత్రులకు తరలించారు. ఘటనా స్థలికి అగ్నిమాపక సిబ్బంది చేరుకుని మంటలను అదుపులోకి తీసుకువచ్చారు. భవనంలో గల మరికొందరిని రక్షించేందుకు అగ్నిమాపక సిబ్బంది శ్రమిస్తున్నారు. షార్ట్ సర్క్యూట్ వల్లే ఈ ప్రమాదం జరిగినట్లు భావిస్తున్నారు. పూర్తి వివరాలు తెలియాల్సి ఉంది. కాగా సంఘటన గురించి సీఎం రేవంత్ రెడ్డి వివరాలు అడిగి తెలుసుకున్నారు. కేంద్ర మంత్రి కిషన్ రెడ్డి ప్రమాద స్థలాన్ని సందర్శించారు.
