శ్రీనగర్: జమ్మూ కశ్మీర్‌లోని నౌగాం పోలీస్ స్టేషన్‌లో గత రాత్రి పొద్దుపోయాక జరిగిన భారీ పేలుడు ఘటనలో తొమ్మిది మంది భద్రతా సిబ్బంది దుర్మరణం చెందినట్లు జాతీయ మీడియా కథనాలు చెబుతున్నాయి. శుక్రవారం రాత్రి 11.22 గంటల ప్రాంతంలో జరిగిన ఈ విస్ఫోటన ఘటనలో మరో 27 మంది తీవ్రంగా గాయపడినట్లు సమాచారం. మృతుల్లో పోలీసులు, ఫోరెన్సిక్‌ సిబ్బంది ఉన్నట్లు స్థానిక అధికార వర్గాలను ఉటంకిస్తూ వార్తలు వస్తున్నాయి.
ఫరీదాబాద్‌ ఉగ్ర కుట్రకు సంబంధించి ఇటీవల ఓ ఇంట్లో స్వాధీనం చేసుకున్న పేలుడు పదార్థాల నుంచి కొన్ని శాంపిల్స్‌ తీస్తుండగా ఈ విస్ఫోటనం జరిగినట్లు అధికార వర్గాలు పేర్కొన్నాయి. భారీ పేలుడువల్ల ఒక్కసారిగా పెద్ద ఎత్తున మంటలు చెలరేగి, దట్టమైన పొగ వ్యాపించింది. పేలుడు శిథిలాల కింద ఇంకొందరు చిక్కుకున్నారని, రెస్క్యూ సిబ్బంది సహాయక చర్యలు చేపట్టినట్లు జాతీయ మీడియా కథనాలు చెబుతున్నాయి. కాగా ఈ ఘటనపై జమ్మూ కశ్మీర్ పోలీసులు అధికారిక ప్రకటన చేయాల్సి ఉంది.
