అనంత్ @ బావోఫెంగ్ ఫ్రీక్వెన్సీ.. ఎక్కడిదీ MMC కమిటీ!?

(‘సమీక్ష’ ప్రత్యేక కథనం)
మావోయిస్ట్ పార్టీ విప్లవోద్యమ చరిత్రలో తాజా ప్రకటన. కొత్త సంవత్సరం వేళ.. జనవరి 1వ తేదీన తామందరం సామూహికంగా లొంగిపోతామంటూ ఎంఎంసీ (మహారాష్ట్ర-మధ్యప్రదేశ్-ఛత్తీస్ ఘఢ్) రాష్ట్రాల స్పెషల్ జోనల్ కమిటీ ప్రతినిధి అనంత్ పేరుతో విడుదలైన పత్రికా ప్రకటన చర్చనీయాంశంగా మారింది. ఆయా మూడు రాష్ట్రాల ముఖ్యమంత్రులను ఉటంకిస్తూ తమ అభ్యర్థన లేఖగానూ ఈ ప్రకటనను మావోయిస్ట్ పార్టీ లీడర్ అనంత్ స్పష్టం చేశారు.

అనంత్ తన లేఖలో ఏమంటారంటే.. MMCలోని నక్సల్ సహచరులందరూ సాయుధ పోరాటానికి తాత్కాలికంగా విరామమిచ్చి, ఆయుధాలను వదిలేసి, ప్రభుత్వం అందిస్తున్న పునరావాసాన్ని అంగీకరిస్తూ జనజీవన స్రవంతిలో కలిసేందుకు సిద్ధంగా ఉన్నట్లు పేర్కొన్నారు. అయితే అప్పటి వరకు మూడు రాష్ట్రాల ప్రభుత్వాలు సంయమనం పాటించాలని, జనవరి 1వ తేదీ వరకు తమకోసం భద్రతా బలగాలు నిర్వహిస్తున్న కూంబింగ్ ఆపరేషన్లను నిలిపివేయాలని, MMC జోన్ వ్యాప్తంగా ఎక్కడా అరెస్టులు, ఎన్కౌంటర్ల వంటి అవాంఛనీయ ఘటనలకు పాల్పడవద్దని ఆయన కోరారు.

ఈ అంశంలో మొత్తం ప్రక్రియను శాంతియుతంగా పూర్తి చేయడానికి ఏ రాష్ట్ర ప్రభుత్వం తమకు అత్యుత్తమైన సహకారాన్ని అందిస్తుందో, తాము ఆ రాష్ట్ర ప్రభుత్వానికి ఆయుధాలు అప్పగించి లొంగిపోతామని, విడివిడిగా కాకుండా ఒకేసారి పెద్ద సంఖ్యలో తాము లొంగుబాటలో పయనిస్తామని అనంత్ పేర్కొన్నారు. మల్లోజుల వేణుగోపాల్, ఆశన్న తరహాలోనే తాము కూడా లొంగుబాటను ఎంచుకుంటామన్నారు. ఈ అంశంలో ఛత్తీస్ గఢ్ హోం మంత్రి విజయ్ శర్మ నుంచి లభించిన ఒకింత సానుకూల స్పందన మిగతా రాష్ట్రాలైన మహారాష్ట్ర, మధ్యప్రదేశ్ ప్రభుత్వాల నుంచి రాలేదన్నారు. తాము మళ్లీ స్పష్టం చేస్తున్నామని, పీఎల్జీఏ వారోత్సవాలను సైతం నిర్వహించబోమని కూడా అనంత్ ప్రకటించారు.

ఈ ప్రకటనలో అనంత్ సాంకేతికంగా ఓ కీలక అంశాన్ని వెల్లడించడం గమనార్హం. వారం రోజులపాటు భద్రతా దళాల గస్తీని నిలిపివేస్తే, MMC జోన్ వ్యాప్తంగా తమ సహచరులను ఒక ఆడియో ద్వారా లొంగుబాటకు పిలుపునిస్తామన్నారు. ఇందుకోసం బావోఫెంగ్ ఫ్రీక్వెన్సీని ఉపయోగించనున్నట్లు వెల్లడించారు. రేడియో ప్రసారానికి సంబంధించిన బావోఫెంగ్ ఫ్రీక్వెన్సీ నెం. 435.715 ద్వారా సహచరులతో సంప్రదించనున్నట్లు చెప్పారు. వచ్చే జనవరి 1వ తేదీ వరకు ప్రతి రోజు ఉదయం 11.00 గంటల నుంచి 11.15 గంటల వరకు బావోఫెంగ్ ఫ్రీక్వెన్సీ ద్వారా సహచరులను సంప్రదిస్తామని చెప్పారు. నిర్ణీత సమయంలో బావోఫెంగ్ ఫ్రీక్వెన్సీని ఆన్ లో ఉంచుతామన్నారు.

అనంత్ ప్రకటించిన బావోఫెంగ్ ఫ్రీక్వెన్సీ ఏమిటనే ప్రశ్నకు వస్తే.. VHF (వెరీ హై ఫ్రీక్వెన్సీ) UHF (అల్ట్రా హై ఫ్రీక్వెన్సీ)గా సిగ్నల్స్ ద్వారా సంభాషించుకునే పరికరాలు. వాకీటాకీలుగా వీటిని వ్యవహరిస్తారు. మావోయిస్ట్ పార్టీ ఇటువంటి పరికరాలను ఎక్కువగా వినియోగిస్తుంది. ఈ పరికరాలను ఉత్పత్తి చేసే ప్రముఖ కంపెనీల్లో బావోఫెంగ్ కూడా ఒకటిగా సాంకేతిక నిపుణులు చెబుతుంటారు. చైనాకు చెందినట్లు తెలుస్తున్న బావోఫెంగ్ వాకీటాకీలు అధునాతనంగా పనిచేస్తాయని పేర్కొంటుంటారు. అటువంటి బావోఫెంగ్ వాకీటాకీల ద్వారానే తాము సహచరులతో సంప్రదించి లొంగుబాటలో పయనించడానికి తమకు జనవరి 1వ తేదీ వరకు గడువు కావాలని అనంత్ మూడు రాష్ట్రాల ప్రభుత్వాలను అభ్యర్థిస్తుండడం విశేషం.

ఇంతకీ ఎవరీ అనంత్? ఏమిటా MMC జోనల్ కమిటీ..? అనే ప్రశ్నకు వస్తే.. ఏవోబీ (ఆంధ్రా-ఒడిషా బార్డర్) కమిటీ తరహాలోనే మావోయిస్ట్ పార్టీలో ఇది కూడా ఓ కమిటీగా తెలుస్తోంది. మహారాష్ట్ర, మధ్యప్రదేశ్, ఛత్తీస్ గఢ్ రాష్ట్రాల సరిహద్దుల కమిటీగా MMCని అభివర్ణిస్తారని సమాచారం. ఇప్పటి వరకు కేంద్ర కమిటీ, రాష్ట్ర కమిటీలు, సౌత్ బస్తర్, నార్త్ బస్తర్ వంటి కమిటీల ప్రకటనలు మాత్రమే తెలుగు మీడియాకు సుపరిచితం. ఈనెల22వ తేదీన MMC పేరుతో తొలి ప్రకటన తెలుగు మీడియాకు పరిచయం కాగా, రెండో ప్రకటన ఈనెల 27వ తేదీతో విడుదలైంది.

అయితే ఈ కమిటీపై భిన్నాభిప్రాయాలు కూడా వ్యక్తమయ్యాయి. MMC పేరుతో మావోయిస్ట్ పార్టీకి ఓ కమిటీ ఉందా? అనేది ప్రశ్న ప్రామాణికంగా కొన్ని న్యూస్ ఛానల్స్ లో అనంత్ తొలి ప్రకటన తర్వాత డిబేట్లు కూడా జరిగాయి. ఛత్తీస్ గఢ్ కు చెందిన ఓ సీనియర్ జర్నలిస్ట్ మిత్రుడు ఇదే అంశంపై స్పష్టతనిస్తూ మావోయిస్ట్ పార్టీలో MMC స్పెషల్ జోనల్ కమిటీ ఎప్పటి నుంచో ఉందన్నారు. ఏవోబీ తరహాలోనే MMC స్సెషల్ జోనల్ కమిటీగా ఆయన పేర్కొన్నారు. ఈ కమిటీ ప్రతినిధిగా పేర్కొంటున్న అనంత్ తెలుగు రాష్ట్రానికి చెందిన మావోయిస్ట్ నాయకుడేనని, కానీ అతనెవరనేది, అసలు పేరు ఏమిటనేది తనకూ ఇతమిద్దంగా తెలియదని ఆయన చెప్పారు.

మొత్తంగా MMC జోనల్ కమిటీ ప్రతినిధి అనంత్ విడుదల చేసిన ప్రకటన మావోయిస్ట్ పార్టీ ఉద్యమ చరిత్రలో తాజా పరిణామం. అనంత్ @ బావోఫెండ్ ఫ్రీక్వెన్సీ 435.715.. డెడ్ లైన్ జనవరి 1వ తేదీ. మావోయిస్ట్ పార్టీ హిస్టరీలో ఇది లాస్ట్ మాస్ సరెండర్.. అవుతుందా? వేచి చూడాల్సిందే అనంత్ ప్రకటనపై మధ్యప్రదేశ్, మహారాష్ట్ర, ఛత్తీస్ గఢ్ ప్రభుత్వాల రియాక్షన్ ఏమిటో..?

Update:
కాగా లొంగుబాటుకు గడువు కోరిన ఎంఎంసీ స్పెషల్ జోనల్ కమిటి ప్రతినిధి అనంత్ అలియాస్ వికాస్ మహారాష్ట్ర పోలీసులకు శుక్రవారం లొంగిపోవడం గమనార్హం. తన అనుచరులు 11 మంది సహా అనంత్ ఆయుధాలతో మహారాష్ట్రలోని గోండియా జిల్లా దారేక్ష పోలీస్ స్టేషన్ లో లొంగిపోయారు. ఐదు రాష్ట్రాల్లో అనంత్ పై రూ. కోటి నగదు రివార్డు ఉంది.