విజయవాడ: మావోయిస్ట్ పార్టీ అగ్రనేత దేవ్ జీ అలియాస్ తిప్పిరి తిరుపతి సెక్యూరిటీ టీంకు చెందిన తొమ్మిది మంది నక్సలైట్లను ఆంధ్రప్రదేశ్ పోలీసులు అరెస్ట్ చేశారు. మావోయిస్ట్ పార్టీ కేంద్ర కమిటీ కార్యదర్శి నంబాల కేశవరావు అలియాస్ బసవరాజ్ ఎన్కౌంటర్ తర్వాత ఆయన స్థానంలో కొత్త సెక్రెటరీగా నియమితుడైనట్లు వార్తల్లోకి వచ్చిన దేవ్ జీకి రక్షణగా ఉండే నక్సల్స్ టీంను ఏపీ పోలీసులు అరెస్ట్ చేయడం సంచలనంగా మారింది. హిడ్మా ఎన్కౌంటర్ పరిణామాల్లోనే ఏపీలోని విజయవాడ, కాకినాడ నగరాల్లో మొత్తం 31 మంది మావోయిస్టులను పోలీసులు అరెస్ట్ చేశారు.
అరెస్టయిన ఆయా నక్సలైట్లలో దేవ్ జీ రక్షన బలగాల్లోని 9 మంది మావోలు ఉన్నట్లు అదనపు డీజీ మహేష్ చంద్ర లడ్హా మీడియాకు వెల్లడించారు. ఏపీ వ్యాప్తంగా అరెస్టయిన మొత్తం 31 మంది మావోయిస్టుల్లో దేవ్ జీ సెక్యూరిటీ టీంను కూడా అరెస్ట్ చేసినట్లు ఆయన ప్రకటించారు. తమకు అందిన సమాచారంతో మరికొంత మంది నక్సలైట్ల కోసం గాలింపు చర్యలను కొనసాగిస్తున్నట్లు లడ్హా ప్రకటించారు. అయితే సెక్యూరిటీ టీం అరెస్టయిన నేపథ్యంలో అగ్ర నేత దేవ్ జీ ఎక్కడ? అనేది కూడా చర్చనీయాంశంగా మారింది.
