హైదరాబాద్: జూబ్లీ హిల్స్ ఉప ఎన్నికల ప్రచారం వేడెక్కింది. రాజకీయ పార్టీల విమర్శలు, ప్రతి విమర్శలు, ఆరోపణలు, ప్రత్యారోపణలు భిన్న ధోరణుల్లో సాగుతున్నాయి. ఈ నేపథ్యంలోనే ఉప ఎన్నికల్లో బీఆర్ఎస్ అభ్యర్థిగా పోటీ చేస్తున్న మాగంటి సునీత దివంగత ఎమ్మెల్యే మాగంటి గోపీనాథ్ ను రెండో పెళ్లి చేసుకున్నప్పటి ఫొటోలు సోషల్ మీడియాలో వైరల్ గా మారాయి. మాగంటి గోపీనాథ్ తో సునీత రెండో పెళ్లి అంశంలో ఆయన మొదటి భార్య మాలినీదేవి, కొడుకు ప్రద్యుమ్న చేస్తున్న ఆరోపణలు, విమర్శల సంగతి ఎలా ఉన్నప్పటికీ, గోపీనాథ్ తల్లి మహదానంద కుమారి కూడా ఎన్నికల వేళ తెరపైకి వచ్చి సంధిస్తున్న ప్రశ్నలు చర్చనీయాంశంగా మారాయి. తన కుమారుడు గోపీనాథ్ మరణంపై కేటీఆర్ ను లక్ష్యంగా చేసుకుని గోపీనాథ్ తల్లి మహదానంద పలు వ్యాఖ్యలు చేశారు.
ఈ నేపథ్యంలోనే గోపీనాథ్ సునీతను రెండో పెళ్లి చేసుకున్నప్పటి ఫొటో, కలిగిన సంతానంతో గోపీనాథ్, సునీత గడిపిన సంతోషపు వేడుకల ఫొటోలు కూడా వెలుగులోకి వచ్చాయి. ఈ ఫొటోలను బీఆర్ఎస్ నాయకుడు మన్నె క్రిశాంక్ కూడా తన సోషల్ మీడియా ఖాతాలో ప్రదర్శించడం గమనార్హం. పోలింగ్ కు సరిగ్గా మూడురోజుల ముందు ప్రచారం ముగుస్తున్నవేళ, కాంగ్రెస్ మీడియా మాగంటి గోపీనాథ్ తల్లి తదితరులతో బీఆర్ఎస్ అభ్యర్థి మాగంటి సునీతపై మాట్లాడిస్తోందని క్రిశాంత్ ఈ సందర్భంగా ఆరోపించారు. నామినేషన్ల పరిశీలలన రోజునే చేసిన ఆరోపణలను ఎన్నికల అధికారులు కొట్టిపారేశారని గుర్తు చేశారు. గోపీనాథ్ తో సునీత పెళ్లి ఆయన తల్లి సమక్షంలోనే జరిగిందని, 23 ఏళ్ల వైవాహిక జీవితంలో ముగ్గురు పిల్లలు కలిగారని ఆయన పేర్కొన్నారు.
