ప్రస్తుత సీఎంపై ప్రజల్లో ఇంత వ్యతిరేకత వస్తుందని ఊహించలేదని బీఆర్ఎస్ చీఫ్, మాజీ సీఎం కేసీఆర్ వ్యాఖ్యానించారు. తెలంగాణాలో పార్టీ మారిన ఎమ్మెల్యేల స్థానాల్లో ఖచ్చితంగా ఉప ఎన్నికలు వస్తాయని, ఆ ఎన్నికల్లో బీఆర్ఎస్ సత్తా చాటాలని పార్టీ కేడర్ కు పిలుపునిచ్చారు. తెలంగాణ భవన్‌లో కేసీఆర్ అధ్యక్షతన పార్టీ విస్తృత స్థాయి కార్యవర్గ సమావేశం బుధవారం జరిగింది.
ఈ సందర్భంగా కేసీఆర్ మాట్లాడుతూ, రాష్ట్రంలో కాంగ్రెస్‌ గ్రాఫ్‌ పడిపోతోందని, ఇక ఆ పార్టీ లేవదన్నారు. కాంగ్రెస్‌ ప్రభుత్వ హయాంలో రాష్ట్ర ఆదాయం పడిపోతున్నదని, బీఆర్ఎస్ హయాంలో ఏటా ఆదాయం పెంచుకుంటూ వెళ్లామన్నారు. ప్రస్తుతం కూడా అదే అధికారులు ఉన్నారని, కానీ వారిచేత ఈ ప్రభుత్వానికి పని చేయించుకోవడం రావడం లేదని కేసీఆర్ అన్నారు.
బీఆర్ఎస్ పార్టీ ఆవిర్భవించి 25వ సంవత్సరంలోకి అడుగిడుతున్న నేపధ్యంలో సిల్వర్ జూబ్లీ వేడుకలను ఏడాది పొడవునా నిర్వహించాలని కోరారు. పార్టీపరంగా విద్యార్థి, మహిళ సహా పార్టీ అనుబంధ విభాగాలను మరింత పటిష్ట పేర్చాల్సిన అవసరం ఉందన్నారు. అందుకోసం సీనియర్ పార్టీ నేతలతో కూడిన సబ్ కమిటీలను ఏర్పాటు చేసి కార్యాచరణ ప్రారంభించాలని కేసీఆర్ ఆదేశించారు. పార్టీ కమిటీలు వేయాలని నిర్ణయించినట్లు తెలిపారు. ఈ కమిటీలకు ఇన్‌చార్జ్‌గా మాజీ మంత్రి హరీశ్‌ రావుకు బాధ్యతలు అప్పగించారు. త్వరలోనే మహిళా కమిటీలను ఏర్పాటు చేస్తామన్నారు.
అదేవిధంగా వచ్చే ఏప్రిల్‌ 27న భారీ బహిరంగ సభను నిర్వహించనున్నట్లు బీఆర్ఎస్ చీఫ్ ప్రకటించారు. ఏప్రిల్‌ 10వ తేదీ నుంచి బీఆర్ఎస్ సభ్యత్వ నమోదు కార్యక్రమం ఉంటుందని, ప్రతి జిల్లా కేంద్రంలో పార్టీ సభ్యత్వ నమోదు కార్యక్రమం కొనసాగుతుందన్నారు. పార్టీ అనుబంధ సంఘాల పటిష్టతకు సీనియర్ నేతలతో సబ్ కమిటీలు వేయనున్నట్లు తెలిపారు. అదే నెల 10న పార్టీ ప్రతినిధుల సభ కూడా ఉంటుందని కేసీఆర్ చెప్పారు. తెలంగాణాలో ఖచ్చితంగా తిరిగి అధికారంలోకి వస్తామనే ధీమాను గులాబీ పార్టీ అధినేత వ్యక్తం చేశారు.
