బీఆర్ఎస్ చీఫ్ కేసీఆర్ ఎర్రవెల్లిలోని తన ఫాంహౌజ్ లో చండీయాగం చేస్తున్నారా? తాజా రాజకీయ పరిస్థితులు, ఎమ్మెల్సీ, తన కూతురు కవిత వ్యవహారం, వివిధ విచారణలు, కమిషన్ల నివేదికలు తదితర ప్రతికూల వాతావరణ పరిణామాల నేపథ్యంలో గులాబీ పార్టీ బాస్ మరోసారి చండీయాగం చేస్తున్నారనే వార్తలు వచ్చాయి. కొన్ని ప్రముఖ వార్తా సంస్థలతోపాటు అప్రముఖ డిజిటల్ మీడియా వేదికలు కూడా కేసీఆర్ మళ్లీ చండీ యాగం చేస్తున్నట్లు భారీ వార్తా కథనాలను వండి వార్చాయి. అయితే కేసీఆర్ చండీయాగం చేస్తున్నారనే వార్తా కథనాలు నిరాధారమని, దుష్ప్రచారమని బీఆర్ఎస్ అధికారిక వర్గాలు వెల్లడించాయి. కేసీఆర్ ఎటువంటి యాగం నిర్వహించడం లేదని, ఈ అంశంలో వస్తున్న వార్తా కథనాలు ముచ్చట పడి రాస్తున్న పెయిడ్ ఆర్టికల్స్ గా కొట్టిపారేశాయి. ఇదిలా ఉండగా కేసీఆర్ చండీయాగం నిర్వహిస్తున్నారనే వార్తా కథనాలపై బీఆర్ఎస్ టెక్ సెల్ ‘ఎక్స్’ ఖాతాలో కేసీఆర్ పీఆర్వో కూడా క్లారిటీ ఇవ్వడం గమనార్హం.
‘బీఆర్ఎస్ అధినేత కె. చంద్రశేఖర్ రావు ఎర్రవెల్లిలోని తన నివాసంలో చండీ యాగం నిర్వహిస్తున్నారని జరుగుతున్న దుష్ప్రచారాన్ని తీవ్రంగా ఖండిస్తున్నాం. కె. చంద్రశేఖర్ రావు కార్యాలయం నుంచీ గానీ, బీఆర్ఎస్ పార్టీ కార్యాలయాల నుంచీ గానీ ఎటువంటి అధికారిక ప్రకటన వెలువడలేదు. అయినా కూడా కనీస సమాచారం తెలుసుకోకుండా, వాస్తవాలను నిర్ధారించుకోకుండా, తమ ఇష్టం వచ్చినట్లుగా ఫామ్‌హౌస్‌లో చండీయాగం అంటూ ప్రముఖ ఛానెళ్లు, పత్రికలు ఈ దుష్ప్రచారాన్ని కొనసాగించడం బాధ్యతారాహిత్యం. తెలంగాణ సమాజాన్ని తప్పుదోవ పట్టించే విధంగా కె. చంద్రశేఖర్ రావు ప్రతిష్ఠను భంగపరిచే విధంగా కొనసాగిస్తున్న ఇటువంటి అవాస్తవాలను, అసత్యాలను వార్తల పేరుతో చేసే దుష్ప్రచారాన్ని తక్షణమే నిలిపివేయాలి. తమ తమ ఛానెళ్ల నుంచి ఈ వార్తలను తొలగించాలని అన్ని పత్రికలు, ఛానెళ్ల యాజమాన్యాలను, ఎడిటర్లను కోరుతున్నాం.’ అని కేసీఆర్ పీఆర్వో పేర్కొన్నారు.
