ఖమ్మం: సీపీఎం రాష్ట్ర నాయకుడు సామినేని రామారావు హత్య కేసు దర్యాప్తును పోలీసులు ఓ కొలిక్కి తీసుకువచ్చినట్లు తెలుస్తోంది. సామినేని హత్య కేసులో ఇక మిగిలింది ‘సాంకేతిక’ ఆధారం మాత్రమేనని తెలుస్తోంది. ఇది లభిస్తే ఘటనకు దారి తీసిన పరిణామాలు సంచలనాత్మకంగా ఉండవచ్చని సమాచారం. గత నెల 31వ తేదీన మధిర నియోజకవర్గంలోని చింతకాని మండలం పాతర్లపాడులో సీపీఎం ముఖ్య నాయకుడు సామినేని రామారావును గుర్తు తెలియని దుండగులు దారుణంగా హత్య చేసిన సంగతి తెలిసిందే.
ఈ ఘటనపై డిప్యూటీ సీఎం మల్లు భట్టి విక్రమార్క తీవ్రంగా స్పందించారు. దోషులు ఎంతటివారైనా వదిలిపెట్టే ప్రసక్తేలేదని, హంతకులను వెంటనే పట్టుకోవాలని పోలీసులను ఆదేశిస్తున్నట్లు ఘటన జరిగిన గంటల్లోనే ఆయన ప్రకటన చేశారు. ఇదే దశలో తమ పార్టీ నేతను హత్య చేసినవారిని వెంటనే అరెస్ట్ చేయాలని డిమాండ్ చేస్తూ సీపీఎం పార్టీ కూడా వివిధ దశల్లో తీవ్ర స్థాయిలో ఆందోళనా కార్యక్రమాలను నిర్వహించింది.
ఈ నేపథ్యంలోనే ఖమ్మం జిల్లా పోలీసు యంత్రాంగం సామినేని రామారావు హత్య కేసును ప్రతిష్టాత్మకంగా భావించింది. ఇందులో భాగంగానే దర్యాప్తును వేగవంతం చేసింది. వేర్వేరు విభాగాలకు చెందిన ముగ్గురు ఏసీపీలు, సీఐలు, ఎస్ఐలు సహా దాదాపు 30 మంది పోలీస్ అధికారులు గడచిన నెలరోజులుగా కేసును దర్యాప్తు చేస్తున్నారు. ‘జీరో ఎవిడెన్స్’ ఘటనగా చెబుతున్న కేసు దర్యాప్తు పోలీసులకు పెను సవాల్ గా పరిణమించిందనే చెప్పాలి. అయితే మొత్తంగా నెలరోజులు గడిచాక సామినేని హత్యకు గల కారణాలపై దర్యాప్తు అధికారులు ఓ ముగింపునకు వచ్చినట్లు విశ్వసనీయ సమాచారం.
హత్యకు దారి తీసిన పరిస్థితులపై అవసరమైన సమాచారం లభ్యమైనప్పటికీ, ‘సాంకేతిక’ ఆధారంకోసం తీవ్రంగా ప్రయత్నిస్తున్నట్లు తెలుస్తోంది. ఇది లభిస్తే ఈ కేసులో ఏం జరిగింది? సామినేని రామారావును అత్యంత దారుణంగా హత్య చేసిందెవరు? అనే ప్రశ్నలకు జవాబును వెల్లడించే అవకాశమున్నట్లు సమాచారం. మొత్తంగా నెలరోజుల శ్రమలో దర్యాప్తులో కేసు ఓ కొలిక్కి వచ్చినప్పటికీ, అందుకు కీలకంగా భావిస్తున్న సాంకేతిక ఆధారం కోసం పోలీసులు ప్రస్తుతం వేటలో ఉన్నారు. త్వరలోనే ఈ కేసులో సంచలన అంశాలు బహిర్గతమయ్యే అవకాశం కనిపిస్తోంది.
