జంగిల్ ప్యాచ్ డ్రెస్సులో ఇంటెలిజెన్స్ చీఫ్..! హిడ్మా ‘ఎన్కౌంటర్’లో ఇంట్రస్టింగ్ ఐపీఎస్ స్టోరీ

(‘సమీక్ష’ ప్రత్యేక కథనం)
ఇంటెలిజెన్స్ విభాగం.. ప్రభుత్వానికి కళ్లు, చెవులు, ముక్కుగా భావిస్తారు. ఎక్కడ ఏం జరిగినా, చీమ చిటుక్కుమన్నా నివేదికల రూపంలో పాలక పార్టీ అధినేతకు నివేదించడమే ఇంటెలిజెన్స్ వింగ్ ప్రధాన కర్తవ్యం. ఇందులో లా అండ్ ఆర్డర్ అంశాలు కూడా ప్రధానంగా ఇమిడి ఉంటాయి. ఆ తర్వాతే మిగతా అంశాలుగా చెబుతారు. టెర్రరిస్టు కార్యకలాపాలు, తీవ్ర వాదుల కదలికలపై ఇంటెలిజెన్స్ ప్రత్యేక నిఘాను ఏర్పాటు చేస్తుంది. కానీ ‘పిక్చర్’లో ఇంటెలిజెన్స్ అధికారులెపుడూ ప్రత్యక్షంగా కనిపించరు. ఏదేని ముఖ్య ఘటనల్లో లా అండ్ ఆర్డర్ కు పోలీస్ బాస్ గా వ్యవహరించే డీజీపీ పక్కన సివిల్ డ్రెస్సుల్లో మాత్రమే ఇంటెలిజెన్స్ అధికారులు అరుదుగా కనిపిస్తుంటారు.

అయితే మోస్ట్ వాంటెడ్ మావోయిస్ట్ లీడర్ హిడ్మా ఎన్కౌంటర్ ఘటనలో, ఏపీ వ్యాప్తంగా ఐదు జిల్లాల్లో అరెస్టయిన 50 మంది నక్సలైట్లను మీడియా ముందు ప్రవేశపెట్టిన సందర్భంలో ఏపీ ఇంటెలిజెన్స్ చీఫ్ గా బాధ్యతలు నిర్వహిస్తున్న అదనపు డీజీ హోదా ఐపీఎస్ అధికారి మహేష్ చంద్ర లడ్హా నేరుగా ‘పిక్చర్’లోకి రావడం ఆసక్తికర అంశంగా మారింది. హిడ్మా సహా ఆరుగురు నక్సల్స్ ఎన్కౌంటర్ వివరాలు వెల్లడించే సమయంలో రంపచోడవరం కేంద్రంగా నిర్వహించిన మీడియా సమావేశంలో ఇంటెలిజెన్స్ చీఫ్ మహేష్ చంద్ర లడ్హా ‘జంగిల్ ప్యాచ్’ డ్రెస్సులో కనిపించడం ప్రత్యేక విశేషం.

ఎన్కౌంటర్ ఘటనల్లో పాల్గొన్న సందర్భాల్లో, అడవుల్లో కూంబింగ్ నిర్వహించే సమయాల్లో మాత్రమే పోలీసులు, అధికారులు జంగిల్ ప్యాచ్ డ్రెస్సులను ధరిస్తారు. అడవుల్లో నక్సల్స్ ఆపరేషన్ లో పాల్గొనే సమయాల్లో ప్రత్యేకంగా ఈ జంగిల్ ప్యాచ్ డ్రెస్సులను ధరించడానికీ కారణముంది. ‘ప్రకృతిలో ఒదిగిపోవడం’ అనే ఫార్ములాకు అనుగుణంగా ఆహార్యం ఉండడమే జంగిల్ ప్యాచ్ డ్రెస్సులోని అసలు ఆంతర్యం. నక్సల్స్ వ్యతిరేక ఆపరేషన్ లో పాల్గొనే పోలీసులు పచ్చని అడవుల్లో కలిసిపోయినట్లు కనిపించడమే ఈ డ్రెస్సు ప్రత్యేకత. ఇందుకు విరుద్ధంగా ఇతర రంగుల డ్రెస్సులను ధరించి నక్సల్స్ ఏరివేత ఆపరేషన్స్ లో పాల్గొంటే దూరం నుంచి ఎదుటివారికి కనిపించే అవకాశం ఉండి ప్రమాదం ఏర్పడవచ్చు. అందువల్లే అడవుల్లోకి కూంబింగ్ కోసం వెళ్లే పోలీసులు జంగిల్ ప్యాచ్ డ్రెస్సులను విధిగా ధరిస్తారు.

ఇటువంటి ‘జంగిల్ ప్యాచ్’ డ్రెస్సుతో నిన్న రంపచోడవరంలో నిర్వహించిన మీడియా సమావేశంలో హిడ్మా ఎన్కౌంటర్ ఘటన పూర్వాపరాలు వెల్లడిస్తూ ఇంటెలిజెన్స్ చీఫ్ మహేష్ చంద్ర లడ్హా కనిపించడం విశేషం. విశ్వసనీయ సమాచారం ప్రకారం రెండు పోలీస్ పార్టీలను లీడ్ చేస్తూ నిన్న జరిగిన ఎన్కౌంటర్ ఘటనలో ఏపీ ఇంటెలిజెన్స్ చీఫ్ మహేష్ చంద్ర లడ్హా కూడా ప్రత్యక్షంగా పాల్గొన్నట్లు తెలుస్తోంది.

ఈ నేపథ్యంలోనే బుధవారం నిర్వహించిన మీడియా సమావేశంలో కూడా ఇంటెలిజెన్స్ చీఫ్ గా, అదనపు  డీజీ హోదాలో గల మహేష్ చంద్ర లడ్హా ఫుల్ యూనిఫాంలో కనిపించడం మరో విశేషం. అంటే నిన్నటి హిడ్మా ఎన్కౌంటర్ ఘటన నుంచి విజయవాడ, కాకినాడ, ఏలూరు తదితర ప్రాంతాల్లో అరెస్ట్ చేసిన 50 మంది మావోయిస్టుల అరెస్ట్ అంశం వరకు పిన్ టూ పిన్ మహేష్ చంద్ర నాయకత్వంలోనే ‘ఆపరేషన్’ జరిగినట్లు భావిస్తున్నారు. కేంద్ర సర్వీసులో గల లడ్హాను ఏపీ సీఎం చంద్రబాబు ప్రత్యేకంగా పట్టుబట్టి మరీ రాష్ట్రానికి రప్పించుకుని కీలకమైన ఇంటెలిజెన్స్ విభాగానికి చీఫ్ గా నియమించారంటే ఆయన ప్రాధాన్యతను అర్థం చేసుకోవచ్చు. ఇంతకీ ఎవరీ మహేష్ చంద్ర లడ్హా.? ఏమిటీ ఐపీఎస్ అధికారి నేపథ్యం? అనే వివరాల్లోకి వెడితే..

రాజస్థాన్ లోని బిల్వాడా జిల్లాలో గల ఓ కుగ్రామంలో జన్మించిన లడ్హా ఉమ్మడి ఆంధ్రప్రదేశ్ లోనూ పలు కీలక బాధ్యతలను నిర్వహించారు. 1998 బ్యాచ్ కు చెందిన ఈ ఐపీఎస్ అధికారికి నక్సల్స్ ఆపరేషన్ లో ప్రత్యేక పేరుంది. శిక్షణ పూర్తి చేసుకున్నాక విశాఖ జిల్లా చింతపల్లి ఏఎస్పీగా ఫస్ట్ పోస్టింగ్ పొందారు. ఆ తర్వాత మహబూబ్ నగర్ ఓఎస్డీగా పని చేశారు. జిల్లా ఎస్పీగా ఆయనకు 2004లో ప్రకాశంలో లభించింది. ఇక్కడ నక్సల్స్ వ్యతిరేక ఆపరేషన్లలో ప్రత్యేకంగా నిలిచారు.

అయితే ఒంగోలు రోడ్డుపైనే లడ్హాను చంపేందుకు నక్సలైట్లు సైకిల్ పై క్లెమోర్ మైన్స్ అమర్చి పేల్చారు. ఈ ప్రమాదం నుంచి లడ్హా త్రుటిలో తప్పించుకున్నారు. ఆ తర్వాత నిజామాబాద్ ఎస్పీగా బదిలీ అయి, 2005 సెప్టెంబర్ నుంచి 2007 ఫిబ్రవరి వరకు అక్కడ పని చేశారు. అనంతరం గుంటూరు జిల్లా ఎస్పీగానూ పని చేశారు. రౌడీయిజం, ఫ్యాక్షనిజంపై ఉక్కుపాదం మోపారు. హైదరాబాద్ ఈస్ట్ జోన్ డీసీపీగా కూడా లడ్హా పనిచేశారు. అనంతరం సెంట్రల్ సర్వీసుకు వెళ్లి ఎన్ఐఏ వంటి కీలక విభాగంలో పనిచేశారు. ఆ తర్వాత సీఆర్పీఎఫ్ దక్షిణ విభాగపు ఐజీగా విధులు నిర్వహిస్తూ అప్పట్లోనే ఛత్తీస్ గఢ్ లోని పలు ప్రాంతాల్లో పర్యటించారు.

విజయవాడ జాయింట్ పోలీస్ కమిషనర్ గా బాధ్యతలు నిర్వహించిన సమయంలో కాల్ మనీ కేసు దర్యాప్తులో కీలకంగా వ్యవహరించారు. విశాఖ పోలీస్ కమిషనర్ గానూ పనిచేసిన లడ్హా అక్కడ కూడా తనదైన ప్రత్యేక శైలిని కనబర్చి రౌడీలు పారిపోయేలా చేశారు. ఇటువంటి అనేక కీలక బాధ్యతలు నిర్వహించిన మహేష్ చంద్ర లడ్హా నిజాయితీ అధికారిగా, వివాదరహితునిగా పేరుగాంచారు.

అయితే దాదాపు నాలుగేళ్లపాటు డిప్యుటేషన్ పై కేంద్ర సర్వీసుల్లో గల లడ్హాను చంద్రబాబు ప్రభుత్వ ప్రత్యేక లేఖతో మళ్లీ రాష్ట్ర సర్వీసుకు వచ్చారు. నిరుడు జూలై 2వ తేదీన రాష్ట్ర ఇంటెలిజెన్స్ చీఫ్ గా మహేష్ చంద్ర లడ్హాను నియమిస్తూ ప్రభుత్వం ఉత్తర్వు జారీ చేసింది. స్టేట్ ఇంటెలిజెన్స్ చీఫ్ నాయకత్వంలోనే గ్రేహౌండ్స్, ఎస్ఐబీ, ఇంటెలిజెన్స్ సెక్యూరిటీ వింగ్, కౌంటర్ ఇంటెలిజెన్స్ తదితర నిఘా విభాగాలు పనిచేస్తాయి.

మావోయిస్టుల అంశంలో గడచిన రెండు నెలలుగా తమ ‘ఇంటెలిజెన్స్’ విభాగం నిఘా వేసిందని, పక్కా ఇంటెలిజెన్స్ సమాచారంతోనే హిడ్మా ఎన్కౌంటర్ ఘటన, 50 మంది నక్సల్స్ అరెస్ట్ ఉదంతాలు చోటు చేసుకున్నాయని ఏపీ ఇంటెలిజెన్స్ అదనపు డీజీ మహేష్ చంద్ర లడ్హా మీడియా సమావేశాల్లో వెల్లడించారు. ఇటువంటి సందర్భాల్లో ఇంటెలిజెన్స్ చీఫ్ గా వ్యవహరించే అధికారులు జంగిల్ ప్యాచ్ డ్రెస్సులో, ఫుల్ యూనిఫాం ధరించి మీడియా సమావేశాలు నిర్వహించి వెల్లడించడం నక్సల్స్ వ్యతిరేక ఆపరేషన్లలోనే కాదు, పోలీసు చరిత్రలోనే ప్రథమంగా పేర్కొనవచ్చు.

నక్సల్స్ ఏరివేత ఆపరేషన్లలో తనకంటూ ప్రత్యేక ముద్ర గల లడ్హా హిడ్మా ఎన్కౌంటర్ ఆపరేషన్ లో పాల్గొన్నట్లు తెలుస్తున్న సమాచారం కూడా అత్యంత ఆసక్తికరం. అంతేకాదు ఏళ్లతరబడి ఛత్తీస్ గఢ్ లో భద్రతా బలగాలు గాలిస్తున్న మోస్ట్ వాంటెడ్ మావోయిస్ట్ లీడర్ హిడ్మాను ఎన్కౌంటర్ లో మట్టుబెట్టిన ఘటన క్రెడిట్ ను సైతం ఇంటెలిజెన్స్ చీఫ్ గా మహేష్ చంద్ర లడ్హా దక్కించుకోవడం మరో విశేషం. కాగా ఏపీ డీజీపీ హరీష్ కుమార్ గుప్తాతోపాటు లా అండ్ ఆర్డర్ అదనపు డీజీ స్థాయి అధికారి మరొకరు కూడా ప్రధాని నరేంద్ర మోదీ పుట్టపర్తి పర్యటన బందోబస్తు విధుల్లో ఉండడం కూడా  ఈ సందర్బంగా గమనార్హం.