హైదరాబాద్: ఇమ్మడి రవి అలియాస్ ఐ బొమ్మ రవిని పోలీసులు అరెస్ట్ చేసిన తర్వాత అతనికి సోషల్ మీడియాలో భారీ ఎత్తున మద్ధతు లభిస్తుండడం ఆశ్యర్యకరమైన అంశమనే చెప్పాలి. సినిమాల పైరసీకి పాల్పడిన ఇమ్మడి రవి చర్యలను సోషల్ మీడియాలో సమర్ధిస్తూ అనేక మంది పోస్టులు పెడుతుండడం గమనార్హం. ఇమ్మడి రవి చర్యల్లో తప్పు లేదని, అతనేమీ దేశ ద్రోహానికి పాల్పడలేదని నెటిజన్లు సోషల్ మీడియాలో వ్యాఖ్యానిస్తున్నారు. ఇదే దశలో సినీ ఇండస్ట్రీలోని కొందరు చర్యలను సైతం విమర్శిస్తున్నారు. చట్ట రీత్యా ఇమ్మడి రవి చేష్టలు నేరమైనప్పటికీ, నేరానికి ‘హీరో ఎలివేషన్ల’ సంగతేంటని పలువురు ప్రశ్నిస్తున్నారు. కొన్ని సినిమాలను సైతం ఉదహరిస్తున్నారు. అయితే రవి చర్యలను ప్రోత్సహించవద్దని హైదరాబాద్ సీపీ సజ్జన్నార్ హితవు చెప్పారు. పోలీసులు అరెస్ట్ చేసిన ఐ బొమ్మ రవి పట్ల సోషల్ మీడియాలో కనిపిస్తున్న అనేక పోస్టుల్లో కొన్ని ‘సమీక్ష’ పాఠకుల కోసం..
‘సామాన్యునికి దూరంగా సినిమా., రవిలు పుట్టుకొస్తారు’
సినిమాలను పైరసీ చేయడం చట్టరీత్యా నేరమే..
కాదనటం లేదు.
కానీ….
ఇమ్మడి రవి చేసిన దాంట్లో తప్పు లేదు అని అనిపిస్తుంది.
థియేటర్ కి వెళ్లి సినిమాలు చూడలేని పేదవాళ్లకు అందుబాటులో ఉండి ఐ బొమ్మ ద్వారా సినిమాలు చూపించాడు.
ఇక్కడ దేశద్రోహం ఏమీ చేయలేదు.
తన టాలెంట్ తో సినిమా కోడ్ లను హ్యాక్ చేసి పేద ప్రజలకు ఆ సినిమాను కుటుంబం మొత్తం రూపాయి ఖర్చు లేకుండా ఇంట్లోనే కూర్చొని చూసేలా అందుబాటులో తీసుకుని వచ్చాడు.
కారణమేంటంటే..?
టికెట్ ధరలు సామాన్యుడికి అందుబాటులో లేకపోవడం వలన.
సినిమా అనేది వినోదాన్ని కలిగించేది.
కొన్ని సినిమాలు జీవితాంతం గుర్తుపోయేలా ఉంటాయి.
అంతేకాదు…. సినిమాలు ప్రజలను ఎంతగానో ప్రభావితం చేస్తాయి.
ఈ బిజీ జీవితంలో కాస్త విరామం కోసం సినిమాలను చూస్తారు.
అవి కాస్త టిక్కెట్లు ధరలు పెరగడంతో సామాన్య ప్రజలకు రాను రాను ఆవినోదం కూడా లేకుండా పోతుంది.
రూ. 100 కోట్ల బడ్జెట్ పెట్టి రూ. 1000 కోట్లు సామాన్య ప్రజల నుంచి దోచుకుంటున్నారు ఈ సినిమా వాళ్ళు. తద్వారా టికెట్లు రేట్లు ఇష్టానుసారంగా పెంచేస్తున్నారు. ఒక సినిమాకు ఇద్దరు పిల్లల్ని తీసుకొని వెళ్లి చూడాలంటే రూ. 5,000 రూపాయలు ఖర్చు. అక్కడ తినిబండరాలు కూడా విపరీతమైన ధరలు. సామాన్యుడు సినిమా థియేటర్ కి వెళ్లి సినిమాను చూడలేని దుస్థితి. సినిమాల్లో నటించే హీరోలకు రెమ్యూనరేషన్ కోట్లలో ఉంటుంది. అది కూడా సామాన్య ప్రజల మీదే అధిక టికెట్ల ధరలతో రుద్దుతున్నారు.
ఇమ్మడి రవి ఇంటర్మీడియట్ వరకు చదువుకున్న మంచి టాలెంట్ ఉన్న వ్యక్తి. హ్యాక్ చేయడం అనేది సామాన్య విషయం కాదు. ఎంతో టాలెంట్ ఉంటే కానీ ఇలాంటి పనులు చేయలేరు. కారణము ఏదైనాప్పటికీ, దేశానికి టాలెంట్ ద్వారా ద్రోహం చేయలేదు కదా..? ప్రజలను అడ్డగోలుగా సినిమాల ద్వారా దోచుకునే వాళ్లకు చెక్ పెట్టాడు. సామాన్య ప్రజలకు ఐ బొమ్మ ద్వారా ఉచితంగా సినిమాలు చూపించాడు.
ఇంతకంటే దేశద్రోహులు మన దేశంలో చాలామంది ఉన్నారు. అడ్డగోలుగా ప్రజల సొమ్మును దోచుకునే వాళ్లు రాజకీయ నాయకుల రూపంలో చాలామంది ఉన్నారు. పోలీస్ డిపార్ట్మెంట్ వాళ్లందరూ కూడా ఇతనిని ఉపయోగించుకొని అడ్డగోలుగా ప్రజల నుంచి దోచుకునేటువంటి రాజకీయ నాయకుల డేటాలను బయటికి లాగండి. ఇటువంటి వ్యక్తులు దేశ భద్రతకు ఎంతగానో ఉపయోగపడతారు. ఇటువంటి వాళ్లను దేశ ఇంటలిజెన్స్ విభాగంలో ఉపయోగించుకుంటే దేశానికి ఎంతగానో ఉపయోగపడతాడు.
రవి సినిమా వాళ్ళను ఏమీ దోచుకోలేదు. సినిమా వాళ్లే పిచ్చిపిచ్చి సినిమాలు తీస్తూ అమాయక ప్రజలను దోచుకుంటున్నారు.
చదువుకొని దేశానికి కుటుంబానికి పయోగపడాల్సినటువంటి మంచి టాలెంట్ ఉన్నటువంటి యూత్ ని సినిమాలకు బానిసలను చేసి ఫ్యాన్స్ రూపంలో యూత్ ని బానిసలుగా మార్చేసుకుంటున్నారు.
సామాన్య ప్రజలను సినిమాలకు బానిసలను చేసి పిచ్చి పిచ్చి కథలతో యూత్ ను రెచ్చగొట్టే విధంగా సినిమాలను తీస్తూ మన కట్టుబొట్లను సంప్రదాయాలను సంస్కృతిని నాశనం చేస్తూ, ఫారిన్ కంట్రీస్ లో షూటింగులు తీసుకుంటూ, వాళ్ల గొప్పతనాన్ని, వాళ్ల కట్టుబొట్లను వాళ్ల కల్చర్ ను తీసుకొచ్చి ఇక్కడ రుద్దుతున్నారు. మన పర్యాటక రంగానికి చెక్ పెడుతున్నారు.
ఆ నలుగురే హీరోలు. ఆ నాలుగు కుటుంబాలే వారసత్వంగా హీరోలుగా రావాలి. బయట వాళ్లకు ఎంత టాలెంట్ ఉన్నా ఎంత అందగత్తెలు అందగాడు అయినా వాళ్లను ఎంకరేజ్ చేయరు. కొంతమంది హీరోలు అయితే ముసలోలైనా సరే ఇంకా నటిస్తూనే ఉంటారు. వాళ్ళ మొహాలు చూడాలంటేనే జనాలకు అసహ్యం కలిగినా వాళ్లు డప్పు వాళ్లే కొట్టుకుంటూ పోడుచుకోవడం, చంపుకోవడం, నరుక్కోవడం లాంటి చూపిస్తూ ప్రజలను తప్పుదోవ పట్టిస్తున్నారు . మళ్ళీ ఒక్క సినిమా సొసైటీకి పనికివచ్చేది ఉండదు.
సినిమా పరిశ్రమంలో క్రింది స్థాయి వర్కర్లకు వాళ్లకు కష్టానికి తగ్గట్టు సరైన రెమ్యునరేషన్ ఉండదు. ముఖాలకు ప్లాస్టిక్ సర్జరీలు చేయించుకుని టేకుల మీద టేకులు తీసుకుని హీరోలకు, హీరోయిన్లకు మాత్రం కోట్లలో రెమ్యూనరేషన్. అదేమన్న అంటే సినిమాల మీద కొన్ని వందల మంది ఆధారపడి బ్రతుకుతున్నారని అని స్టేట్మెంట్ ఇస్తారు. ఆ వందల మంది కష్టాన్ని, తెలివితేటలను దోచుకునేది కూడా హీరోలు ,నిర్మాతలే.
ఇక్కడ మారాల్సింది ప్రజలు. ప్రజలు సినిమా థియేటర్లకు వెళ్లడం మానేస్తే.. ఆటోమెటిగ్గా సినిమా వాళ్ళు డౌన్ అయిపోతారు. అప్పుడు మీ విలువేంటో వాళ్ళ బ్రతుకేంటో వాళ్లకు అర్థమవుతుంది. మార్పు అనేది మన నుంచి మనతోనే స్టార్ట్ అవ్వాలి. ముఖ్యంగా యూత్ అందరూ సినిమాలకు బానిసలు కాకుండా బాగా చదువుకొని తెలివితేటలు పెంచుకొని వ్యక్తిగతంగా ఇటు కుటుంబాలకు అటు దేశానికి ఉపయోగపడే విధంగా ఉండాలి.
ఈ పోలీసులు కూడాను సినిమా వాళ్లకు ఫుల్ సపోర్ట్. సామాన్యుడికి ఏదైనా కష్టం వస్తే.. దిగిరారు కానీ.. కోట్లు పడగలెట్టినటువంటి సినిమా వాళ్లకు మాత్రం ఫుల్ సపోర్ట్ గా నిలుస్తారు. రైతుకు కష్టమొచ్చినా పట్టించుకోరు.. నాకు ఇప్పుడు అర్థమైంది ఏంటంటే..?
CP = Celebrities Police
చివరగా ఒకటి చెప్తున్నాను..
అతన్ని పట్టుకున్న పోలీసులు కూడా ఐ బొమ్మ చూడకుండా లేరు కదా..? వాళ్ళ ఫ్యామిలీస్ కూడా చూసే ఉంటారు కదా..? దీనికి పోలీసులు దగ్గరనుంచి సమాధానం ఏమిటి? సినిమా వాళ్లకు టికెట్లు ధరలు తగ్గించి సామాన్యులకు అందుబాటులో సినిమా చూసే అవకాశాన్ని కల్పించండి
లేదంటే.. ఇలాంటి రవిలు ఇంకొంతమంది పుట్టుకొని వస్తానే ఉంటారు. సినిమాలను పైరసీ చేయడం తప్పు అయినప్పటికీ, పేదలకు అండగా ఉన్న రవి రియల్ హీరో.. ఎవరూ చేయని ఒక సాహసమే చేశాడు.
పిచ్చి పిచ్చి సినిమాలను తీస్తూ ప్రజలను సినిమాలకు బానిసలు చేసి టిక్కెట్లు ధరలు పెంచుతూ అడ్డగోలుగా సంపాదించుకుని విలాస జీవితాలు గడిపేది సినిమా వాళ్ళే. ముందు వాళ్లను అరెస్టు చేయండి.
-✍ పద్మ నమ్మి
🎬… నేరానికి “హీరో ఎలివేషన్లు ” ఎందుకు?
🎭 Pushpa లో స్మగ్లర్ హీరో…
👉🏽Businessman లో మాఫియా హీరో…
👉🏽Pokiri లో గ్యాంగ్‌స్టర్ హీరో…
👉🏽Athadu లో హిట్‌మ్యాన్ హీరో…
👉🏽Kantri లో underworld హీరో…
👉🏽Naayak – Julayi – Yevadu లో
లా బయటే తిరిగే హీరోలు…
👉🏽Temper లో అవినీతి పోలీస్‌ను సెల్ఫ్-స్టైల్‌గా చూపించిన హీరో…
👉🏽Tagore లో మొత్తం పోలీస్ సిస్టమ్‌ను వ్యంగ్యంగా చూపించిన హీరో…
👉🏽Gabbar Singh, Dhee, Sardaar లలో పోలీస్‌ను కామెడీగా చూపించే సీన్లు…
🎭తెలుగు సినిమాలు యేళ్ల తరబడి నేరాన్ని స్టైల్‌గా,
పోలీసును జోక్‌గా,
సిస్టమ్‌ను వీక్‌గా,
క్రిమినల్‌ ను హీరోగా చూపిస్తున్నాయి.
🔥సినిమాల్లో క్రిమినల్స్‌కు మాస్ ఎలివేషన్ ఇచ్చారు …
👉🏽స్మగ్లర్లకు బ్యాక్‌గ్రౌండ్ మ్యూజిక్ ఇచ్చారు…
👉🏽పోలీసును హాస్యాస్పదంగా మార్చేశారు …
అదే ఇప్పుడు రియల్ లైఫ్‌లో రిపీట్ అవుతోంది.
🎭 యువత సినిమా పాత్రలను ప్రేమించడం ఓకే…
కాని నిజ జీవిత నేరస్తులనే హీరోలుగా సెలబ్రేట్ చేయడం?
అదే ఇమ్మడి రవి లాంటి కేసుల్లో స్పష్టంగా కనిపిస్తోంది.
🎭 సినిమాల్లో చూసిన అటిట్యూడ్‌ను…
నిజ జీవిత క్రిమినల్స్ మీదే వేసి మద్దతు ఇస్తున్నారు.
🎭 నిర్మాతలారా –దర్శకులారా …
మీరు వేసిన మాస్ ఎఫెక్ట్,
మీరు ఇచ్చిన క్రైమ్ గ్లామర్,
మీరు చూపించిన పోలీస్ హ్యూమిలియేషన్
ఇప్పుడు రియాలిటీలో మీ ముందే నిలబడుతోంది.
మీ వల్ల. ..
ఈ జెనరేషన్ యొక్క “మోరల్ లెన్స్”నే చెడగొట్టింది.
-✍ ప్రభాకర్ చౌటు
ఐబొమ్మ వల్ల నష్టం సినీ ఇండస్ట్రీకా? OTT యాప్స్ కా?
జనాలకు పైసల్ కూడా కష్టపడితేనే వస్తున్నాయి.
ఉన్నోడు థియేటర్లో చూస్తున్నాడు లేనోడు వాటిల్లో చూస్తున్నారు.
టికెట్ కి 200 తగ్గకుండా వేలకి వేలు పెట్టడానికి కారణం ఏందీ?
హీరోలకి హీరోయిన్స్ కి దర్శకులకు ఇచ్చే వందల కోట్లు ఎందుకు..?
సినిమా టోటల్ బడ్జెట్ 100 కోట్లు అయితే 60 నుంచి 70 కోట్లు దర్శకులకు హీరో హీరోయిన్స్ క్యారెక్టర్ ఆర్టిస్ట్ లకే పోతే ఇంకా సినిమా బడ్జెట్ మహా అయితే 30% 40% ఉంటుంది. రెమ్యూనరేషన్ తగ్గించుకుంటే సినిమా చాలా తక్కువ బడ్జెట్ లోనే తీయొచ్చు. అలా తీసిన సినిమాని తక్కువ రేట్లకే టికెట్లు పెడితే కుటుంబ సభ్యులతో సహా వచ్చి సినిమాలు చూస్తారు. అలా టికెట్ రేట్లు తగ్గితే ఇలాంటి ఐ బొమ్మ ఆ బొమ్మ ఈ బొమ్మలో ఎందుకు చూస్తారు జనాలు. కష్టం ఎవరిదయినా కష్టమే కదా..? ప్రతి ఒక్కరికి ఆశ ఉంటుంది థియేటర్లో వెళ్లి ఆ ఎక్స్పీరియన్స్ తో సినిమా చూడాలి అని. కానీ వందల కోట్ల రెమ్యూనరేషన్ పెంచేసి సినిమాను సామాన్యులకు అందకుండా దూరం చేస్తుంది మీ సినిమా వాళ్ళే..!
సినిమా వాళ్లు చేసేది కరెక్ట్ అయితే.. రవి చేసింది కూడా కరెక్టే.. తమ సినిమాలకు “భారీ బడ్జెట్, పాన్ ఇండియా, వరల్డ్ వైడ్, మల్టీ స్టారర్” అనే ట్యాగ్ లైన్ లు వాళ్ళే ఇచ్చుకుని.. రెండు మూడేళ్ళకు ఒకడు మాఫియాలా సినిమాలు రిలీజ్ చేసి, దానికి దేవుడు అనే సెంటిమెంట్ లు కలిపి.. కథలో బలం లేకపోయినా.. ఎలివేషన్స్ ఇస్తూ.. పక్క భాషల హీరోలను, ముసలి హీరోయిన్లను రుద్దుతూ… ప్రీరిలీజ్, ప్రీమియర్ షో అనే పోరంబోకు పదాలు చెప్పి, పాటకో ఈవెంట్, వీడియోకో ఫంక్షన్ పెట్టి.. బాక్సాఫీస్ మొనగాడు, ఇండస్ట్రీ హిట్, ఏకైక హీరో, సరికొత్త రికార్డులు అనే పదాలు సృష్టించి.. ప్రీక్వెల్, సీక్వెల్ అంటూ సినిమా పిచ్చోళ్ళ వీక్నెస్ వాడుకుని.. రోజుకొక డబ్బున్న బిచ్చగాడు.. సిగ్గులేకుండా.. ప్రేక్షకులను దోచుకున్నప్పుడు.. వాళ్ళ సినిమాలను పైరసీ చేసి.. థియేటర్‌కు వెళ్ళి చూడలేని.. సామాన్యులకు రవి మంచి వాడే.
మీకు నచ్చి చూస్తున్నారు.. చూడమని ఎవడు అన్నాడనే పెద్ద మనుషులు ఉంటారు.. మనిషి మానసిక పరిస్థితి మీద కొట్టడానికి సినిమా పరిశ్రమ ఎప్పటికప్పుడు.. ప్రమోషన్స్ తో రంగంలోకి దిగుతూనే ఉంది.. మీరు చేసింది కరెక్ట్ అయితే.. అతను చేసింది కూడా కరెక్టే..! ఐబొమ్మ నిర్వాహకుడిని అరెస్ట్ చేసి పైరసినీ అరికట్టాం అనుకోవడం ఎలా ఉందంటే టిక్ టాక్ ని బ్యాన్ చేసి చైనాని ఓడించాం.. అని అనుకుంది. తర్వాత ఇంస్టాగ్రామ్ వచ్చింది .
ఐబొమ్మ వలన నష్టం సినీ ఇండస్ట్రీ కా?
OTT యాప్స్ కా?
కోట్ల రూపాయలు ఖర్చు పెట్టి ఎన్నో కష్టాలుపడి ఒక సినిమా నిర్మించి ధియేటర్లో రిలీజ్ చేసిన వెంటనే అది ఆన్లైన్ లో అందుబాటులోకి వచ్చేస్తే ఆ మూవీ నిర్మించినవారికి చాలా నష్టం వస్తుంది. దీనినే పైరసీ అంటారు.. ఇలా పైరసీ చేయడం ఖచ్చితంగా నేరం. కానీ ఐబొమ్మ లో వచ్చే సినిమాలు ధియేటర్లో రిలీజ్ అయిన వెంటనే వచ్చేవి కావు. నాకు తెలిసినంతవరకు ధియేటర్లో రిలీజ్ అయ్యి కలెక్షన్లు సంపాదించుకుని కొన్ని రోజుల తరువాత సాటిలైట్ రైట్స్ ఏదో ఒక OTT యాప్ కి అమ్ముకుని ఆ డబ్బులు కూడా నిర్మాత తీసుకున్నాక ఆఫీషియల్ గా OTT లో రిలీజ్ అయిన సినిమాలు మాత్రమే ఐ బొమ్మలో దర్శనం ఇస్తాయి.
దీని వలన నష్టం అంటూ ఉంటే అది కేవలం ఆ OTT యాప్ వారికే తప్పా సినిమా ఇండస్ట్రీ కి కాదు. ఒకవేళ OTT లో కూడా కలెక్షన్ షేర్ నిర్మాతకి ఉంటే అప్పుడు అది సినీ నిర్మాతకి నష్టమే. కానీ ఈ OTT రైట్స్ ఒక అమౌంట్ కి ఒకేసారి అమ్మేస్తారు కనుక ఇక ఆ సినిమా OTT యాప్ లో ఉన్నా, ఐబొమ్మ లో ఉన్నా సినీ నిర్మాతకి నష్టం లేదు.. ఒకవేళ OTT వారి కోణంలో ఐబొమ్మ చేసింది తప్పే కావొచ్చు.
కానీ చాలా OTT యాప్ లు SUBSCRIPTION కి ముందుగా ఒక రేటు పెడుతున్నారు. అది మనం పే చేసి లోపలికి వెళ్ళాక కూడా ఆ యాప్ లో మనకి నచ్చిన సినిమా చూడటానికి లేదు. మంచి సినిమాలన్నీ రెంట్ కి పెడుతున్నారు. లేదా upgrade చేసుకోమని మళ్ళీ డబ్బులు అడుగుతున్నారు. ఈ మధ్య యాడ్స్ వేస్తున్నారు. అవి వద్దు అనుకుంటే మళ్ళీ డబ్బులు కట్టమంటున్నారు. ఇది కూడా దోపిడీయే కదా? మోసమే కదా..? ఐబొమ్మ చేసింది తప్పే అయితే OTT యాప్స్ చేసేది కూడా తప్పే కదా..?
అసలు రిలీజ్ సినిమాలు దెబ్బ తినేది మూవీ రూల్జ్ వంటి యాప్స్ తో.. ఎందుకంటే సినిమాధియేటర్లో రిలీజ్ ఆయిన నిముషాల్లో ఇందులోకి వచ్చేసి కలెక్షన్స్ పడిపోవడానికి కారణం అవుతున్నాయి..వీలయితే వాళ్ళను అడ్డుకోండి.. సరైన లాయర్ ఉంటే ఐబొమ్మ నిర్వాహకుడు సింపుల్ గా బయటకి వచ్చేస్తాడు. కానీ అతని వలన పేదలకు తక్కువ ధరకే వినోదం దక్కింది అనడం మాత్రం నిజం. ఈ నష్టం కేవలం OTT యాప్స్ కే తప్పా సినిమా ఇండస్ట్రీ కి మాత్రం కానే కాదు.
-✍ గౌతమి పి
ఐ బొమ్మ రవి కంటే మన హీరోలు, దర్శకులు, నిర్మాతలు తక్కువేం కాదు!
భారీ బడ్జెట్ సినిమాలు ఇప్పుడే కాదు. ఒకప్పుడూ వచ్చాయి. సినిమా అనేది ఎప్పటికప్పుడు కొత్తదనంతో, భారీ నిర్మాణ విలువలతో నిర్మితమవుతూనే వుంటుంది. 1980లో వచ్చిన సినిమాలతో పోల్చుకుంటే 1990లో వచ్చిన సినిమాలు ఎప్పుడూ భారీగానే కనిపిస్తాయి. అలాగే 90 లో వచ్చిన సినిమాలతో పోల్చుకుంటే 2000 సంవత్సరంలో వచ్చిన సినిమాలు భారీగా కనిపిస్తాయి. ఇవేప్పుడు నిత్య కృత్యం. ఎప్పుడూ నిర్మాణ విలువలు పెరుగుతూనే ఉంటాయి.
అయితే సమస్యా అల్లా హీరో, దర్శకుల రెమ్యునరేషన్ లు పెరిగిపోవడమే. ఒక కోటి రూపాయల రెమ్యునరేషన్ అనేది చిన్న విషయం ఏమీ కాదు. అయితే హీరోలు రూ. 10 కోట్ల లోపు రెమ్యునరేషన్ నుండి ఒక్కసారిగా వందల కోట్లు రెమ్యునరేషన్ కి వెళ్ళిపోయారు. కాదు కాదు వాళ్ళకి వాళ్ళు పెంచుసుకున్నారు. నిర్మాతలు సినిమాకి చాలా ఖర్చు అయిందంటూ దొంగ లెక్కలు చూపించడం మొదలు పెట్టారు. ఆపై ప్రభుత్వాల నుండి అనుమతులు తెచ్చుకుని భారీగా టికెట్ ధరలు పెంచేసి అమాయక ప్రేక్షకుల ను నిలువు దోపిడి చేశారు.
ఈ మధ్యనే వచ్చిన మిరాయి సినిమా చిత్రీకరణ పరంగా చాలా భారీగా కనిపిస్తుంది. అయితే సినిమాకు అయిన ఖర్చు కేవలం రూ. 60 కోట్లు మాత్రమే. ఇదే సినిమా పేరున్న హీరో తీసి ఉంటే సినిమా ఖర్చు రూ. 250 కోట్లు నుండి రూ. 300 కోట్లు వరకు పెరిగిపోతుంది. అప్పుడు టికెట్ ధరలు ఆకాశాన్ని అంటేవి. అంటే ఇక్కడ తేడా నిర్మాణంలో లేదు. కేవలం హీరోల, దర్శకుల రెమ్యునరేషన్ లోనే ఉంది. ఇలా ప్రజల బలహీనతలను సొమ్ము చేసుకుంటూ కోట్లు దోచుకుంటున్న హీరోలు కూడా ఐ బొమ్మ రవి కంటే తక్కువేం కాదు. అందరూ.. అందరే..!
-✍ జర్నలిస్ట్ రాజు
అలాంటివారిని ప్రోత్సహించవద్దు: సీపీ సజ్జన్నార్
ఐ బొమ్మ వెబ్ సైట్ నిర్వాహకుడు రవిని ప్రోత్సహించవద్దని హైదరాబాద్ పోలీస్ కమిషనర్ వీసీ సజ్జన్నార్ పేర్కొన్నారు. ఐ బొమ్మ రవి అరెస్టయ్యాక పోలీసులపై చాలా మీమ్స్ చేశారని, ఇటువంటి మీమ్స్ చేయవద్దన్నారు. ఉచితంగా సినిమాలు అందిస్తున్నారనే కారణంగా రవిలాంటి వారిని ప్రేక్షకులు ప్రోత్సహించవద్దని సజ్జన్నార్ హితవు చెప్పారు. ఐ బొమ్మ రవి అరెస్ట్ తర్వాత సినీ ప్రముఖులతో కలిసి సజ్జన్నార్ మీడియాతో మాట్లాడారు.
