‘లొట్టపీసు’ కేసులో ఇక సాక్షాత్కరించే ‘సీన్’ ఇదే..!

(‘సమీక్ష‘ మార్క్ ప్రత్యేక కథనం)
హైదరాబాద్: ఇదో ‘లొట్టపీసు’ కేసు.. ఈ డైలాగ్ ఎక్కడో విన్నట్టుంది కదూ! బీఆర్ఎస్ వర్కింగ్ ప్రెసిడెంట్ కేటీఆర్ నోటీ నుంచి పలుసార్లు వెలువడిన పదం ఇది. ఫార్ములా ఈ-కార్ రేస్ కేసులో కేటీఆర్ పదే పదే వల్లించిన వ్యాఖ్య ‘ఇదో లొట్టపీసు కేసు’. ‘హైదరాబాద్ బ్రాండ్ ఇమేజ్ ను కాపాడేందుకు తాను తీసుకున్న నిర్ణయమని, దీనికోసం జైలుకు వెళ్లాల్సి వస్తే, ఒక్కసారి కాదు వంద సార్లయినా వెడతానని, కానీ ఈ కాంగ్రెస్ ప్రభుత్వాన్ని వదిలిపెట్టబోను’ అని ఫార్ములా ఈ కార్ రేస్ వ్యవహారంపై ఏసీబీ కేసు నమోదు చేసిన తర్వాత, విచారణకు హాజరైన సందర్భంలో కేటీఆర్ స్పందిస్తూ మీడియా ముందు మాట్లాడిన మాటలివి. ఇప్పుడీ ‘లొట్టపీసు’ కేసులో అత్యంత కీలక పరిణామం చోటు చేసుకుంది.

ఫార్ములా ఈ-కార్ రేస్ కేసులో మాజీ మంత్రి కేటీఆర్ ను ప్రాసిక్యూషన్ చేసేందుకు రాష్ట్ర గవర్నర్ జిష్ణుదేవ్ వర్మ అనుతించారు.ఈమేరకు గురువారం ప్రాసిక్యూషన్ కు సంబంధించిన ఫైలును క్లియర్ చేసిన గవర్నర్ ఏసీబీకి పంపారు. ఫార్ములా ఈ రేస్ కేసులో రూ. 54.88 కోట్ల అవినీతి జరిగిందనే ఆరోపణలపై బీఆర్ఎస్ వర్కింగ్ ప్రెసిడెంట్ కేటీఆర్ ను A1గా, ఐఏఎస్ అధికారి అర్వింద్ కుమార్ ను A2గా, హెచ్ఎండీఏ రిటైర్డ్ చీఫ్ ఇంజనీర్ బీఎల్ఎన్ రెడ్డిని A3గా పేర్కొంటూ ఏసీబీ కేసు నమోదు చేసిన సంగతి తెలిసేందే. అవినీతి, అధికార దుర్వినియోగం అభియోగాలు ప్రధానంగా ఆయా వ్యక్తులను నిందితులుగా పేర్కొంటూ ఏసీబీ కేసు నమోదు చేసింది. అయితే కేటీఆర్ ప్రజాప్రతినిధిగా ఉన్నందున గవర్నర్ అనుమతి అనివార్యమైంది. దీంతో ఆయన అనుమతిని కోరుతూ ఏసీబీ దాదాపు 70 రోజుల క్రితం ఫైల్ ను గవర్నర్ కు పంపించారు.

ఆర్థిక శాఖ, మంత్రివర్గం, రిజర్వ్ బ్యాంక్, కేంద్ర ఎన్నికల కమిషన్ అనుమతులు లేకుండానే కేటీఆర్ ఆదేశం మేరకు హెచ్ఎండీఏ నుంచి కోట్లాది రూపాయలను డాలర్ల రూపంలో చెల్లించారనేది కేసులోని పూర్వపరాల అభియోగం. కేటీఆర్ వాట్సప్ ద్వారా ఇచ్చిన ఆదేశాల ప్రకారమే తాను చెల్లింపులు చేసినట్లు చీఫ్ సెక్రటరీ నిర్వహించిన డిపార్ట్మెంటల్ ఎంక్వయిరీలో, ఏసీబీ విచారణలో అర్వింద్ కుమార్ అంగీకరించినట్లు వార్తలు వచ్చాయి. ఇందుకు సంబందించిన కేసులో గవర్నర్ కు పంపిన ఫైలుకు ఆమోద ముద్ర పడే అంశంలో రాష్ట్ర ముఖ్యమంత్రి రేవంత్ తోపాటు పలువురు మంత్రులు కూడా రాజకీయ వ్యాఖ్యలు చేశారు. బీఆర్ఎస్, బీజేపీ కుమ్మక్కు కావడంవల్లే కేటీఆర్ ప్రాసిక్యూషన్ కు గవర్నర్ ఆమోద ముద్ర పడడం లేదనేది ఆయా నాయకులు చేసిన వ్యాఖ్యల సారాంశం.

సరే.. ఈ అంశంలో రాజకీయపరమైన విమర్శలు, ప్రతి విమర్శలు, ఆరోపణలు, ప్రత్యారోపణల సంగతి ఎలా ఉన్నప్పటికీ, ఇంతకీ ఈ కేసులో ఇప్పుడేం జరగబోతోందనే అంశంపై రాజకీయంగా ఉత్కంఠ ఏర్పడిందనే చెప్పాలి. వాస్తవానికి ఈ కేసులో కేటీఆర్ ఇప్పటికే పలుసార్లు ఏసీబీ విచారణకు హాజరయ్యారు. అయితే కేటీఆర్ పైనేగాక మిగతా అధికారులపై చట్టపరంగా ముందుకువెళ్లే పరిస్థితి ఏసీబీకి లేకుండా పోయినట్లు అధికారవర్గాలు చెబుతున్నాయి. ఎమ్మెల్యేగా ప్రజాప్రతినిధి హోదాలో కేటీఆర్ ఉన్న పరిస్థితుల్లో ఇతని ప్రాసిక్యూషన్ కు గవర్నర్ అనుమతి తప్పనిసరి. అదేవిధంగా అర్వింద్ కుమార్ ఐఏఎస్ అధికారి కాబట్టి, కేంద్రం నుంచి డీవోపీటీ అనుమతి అనివార్యం. మొత్తానికి కేటీఆర్ ప్రాసిక్యూషన్ కు గవర్నర్ అనుమతి లభించింది. ఇక అర్వింద్ కుమార్ అంశంలోనూ బీవోపీటీ అనుమతి కూడా నేడో, రేపో రావచ్చు కూడా.

వాస్తవానికి ఇప్పటి వరకు కేటీఆర్ ను వేర్వేరు సందర్భాల్లో విచారించిన సందర్భంగా ఆరోపణలు నిర్ధారణ అయ్యాయా? కాలేదా? అనే అంశంపై ఏసీబీ అధికారికంగా ఎక్కడా వెల్లడించకపోవడం గమనార్హం. దర్యాప్తు జరుగుతోందని మాత్రమే ఏసీబీ అధికార వర్గాలు చెప్పాయి. మీడియాలో వచ్చిన భిన్న వార్తాకథనాల సారాంశానికి ఏసీబీ నుంచి అధికారిక సమాచారం లేదనే చెప్పాలి. ఈ పరిస్థితుల్లో.. గవర్నర్ కేటీఆర్ ప్రాసిక్యూషన్ కు అనుమతించిన తాజా పరిణామాల్లో ఇప్పుడేం జరగనుంది? ఇదీ అసలు ప్రశ్న. అధికార వర్గాలు చెబుతున్న ప్రకారం నేరుగా విషయంలోకే వెడితే.. ఈ కేసులో ఏసీబీ ముందున్న ఆప్షన్లు రెండే రెండు.

• మొదటి ఆప్షన్: కేటీఆర్ ను ఏసీబీ మళ్లీ విచారణకు పిలవవచ్చు. విచారణకు సహకరించడం లేదని అరెస్ట్ చేయవచ్చు. లేదంటే కేటీఆర్ ను విచారించి, అరెస్ట్ చేయకుండానే కోర్టులో నేరుగా ఛార్జిషీట్ దాఖలు చేయవచ్చు.
• రెండో ఆప్షన్: డైరెక్ట్ అరెస్ట్ లేకుండా అభియోగాలపై కోర్టులో ఛార్జిషీట్ దాఖలు చేయవచ్చు. అప్పుడు కోర్టు అరెస్ట్ వారెంట్ జారీ చేయవచ్చు. కోర్టు వారెంట్ ఆదేశం మేరకు కేటీఆర్ ను అరెస్ట్ చేయవచ్చు.

• ఇవీ పోలీసు, న్యాయవాద వర్గాలు చెబుతున్న రెండు ఆప్షన్ల సారాంశం. ఇంతకు మించి ఈ కేసులో మరో ఆప్షన్ లేదని ఆయా వర్గాలు చెబుతున్నాయి. ఇందులో ఏ అంశానికి ఏసీబీ ప్రాధాన్యనిస్తుందనేది వేచి చూడాల్సిన అంశం.

కాగా కేటీఆర్ ప్రాసిక్యూషన్ కు గవర్నర్ అనుమతించిన తాజా పరిణామంపై కేంద్ర హోం శాఖ సహాయ మంత్రి బండి సంజయ్ స్పందించారు. బీఆర్ఎస్, బీజేపీ ఒక్కటేనని విమర్శించిన సీఎం రేవంత్ రెడ్డి ఇప్పుడేం చెబుతారని ప్రశ్నించారు. అవినీతి పరుల ఆస్తులు జప్తు చేస్తామని సీఎం గతంలో అన్నారని, గవర్నర్ అనుమతిచ్చిన పరిస్థితుల్లో సీఎం ఏం చేస్తారో చూడాలని సంజయ్ అన్నారు.

అదేవిధంగా కేటీఆర్ ప్రాసిక్యూషన్ కు గవర్నర్ అనుమతించిన తర్వాత మాజీ మంత్రి తన్నీరు హరీష్ రావు కూడా స్పందించారు. కేటీఆర్ పై రాజకీయ కక్ష సాధింపునకు ఇది పరాకాష్టగా అభివర్ణించారు. ప్రశ్నించే గొంతులను సీఎం నొక్కే ప్రయత్నం చేస్తున్నారని, ఇది దుర్మార్గమని వ్యాఖ్యానించారు. స్థానిక సంస్థల ఎన్నికల వేళ రాజకీయ లబ్ధి పొందేందుకు చేస్తున్న నాటకీయమన్నారు. కేటీఆర్ కు పార్టీ పూర్తిగా అండగా ఉంటుందని హరీష్ రావు పేర్కొన్నారు. మొత్తంగా ఫార్ములా ఈ-కార్ రేసు కేసులో కేటీఆర్ ప్రాసిక్యూషన్ కు గవర్నర్ అనుమతించిన పరిణామం తెలంగాణా రాజకీయాల్లో ఇప్పుడు హాట్ టాపిక్.