(‘సమీక్ష’ ప్రత్యేక కథనం)
కొన్ని ఘటనలు చరిత్రలో నిక్షిప్తమై ఉంటేనే బాగుంటుంది. నిగూఢ రహస్యంగా మిగిలిపోతే ఇంకా బాగుంటుంది. అలాగని అన్ని చరిత్రలూ రహస్యంగా ఉండకూడదు. ఎక్కడ.., ఎప్పుడు.., ఎంత అవసరమో.. అంతవరకు మాత్రమే ఘటన తాలూకు వివరాలు బహిర్గతమైతే ఏ దుష్ఫలితాలూ ఉండకపోవచ్చు. కానీ వ్యక్తిగత క్రేజ్ కోసమో, మరే ఇతర లబ్ధికోసమో అసందర్బంగా పురాతనకాలంనాటి ఉదంతాలను బహిర్గతం చేస్తే మాత్రం సరికొత్త చరిత్రకు దారితీసే అనూహ్య సంఘటనలను చూడాల్సిన పరిస్థితులు రావచ్చు. ముఖ్యంగా విప్లవోద్యమంలో పనిచేసి ప్రభుత్వానికి లొంగిపోయిన మాజీ నక్సలైట్లు ఎంత గుంభనంగా ఉంటే అంత మంచిదనే అభిప్రాయాలు ఎప్పటి నుంచో ఉన్నాయి.
ఎందుకంటే.. హీరోయిజం కోసమో? ఉనికి కోసమో? క్రేజీ కోసమో..? తెలియదుగాని ఓ మాజీ నక్సల్ యూ ట్యూబర్ ఒకరికి ఇచ్చిన ఇంటర్వ్యూ అతని హత్యకు దారి తీసిందంటే ఆశ్చర్యం కాదు. విప్లవోద్యమ చరిత్రలో ఈ ఘటన సరికొత్త పేజీకి ఆస్కారం కలిగించిందనే చెప్పాలి. ఇంతకీ ఈ హత్య ఎందుకు జరిగింది? ఎలా జరిగింది? అందుకు దారి తీసిన పరిణామాలేమిటి? అనే వివరాల్లోకి వెడితే..
అతని పేరు బల్లెపు సిద్ధన్న అలియాస్ నర్సయ్య.. సిరిసిల్ల జిల్లా తంగళ్లపల్లి మండలం గండ లచ్చపేటకు చెందిన సిద్దన్న (58) గతంలో నక్సలైట్. ప్రస్తుతం బీఆర్ఎస్ నాయకుడు. నక్సల్ గా ఉన్నపుడు జనజీవన స్రవంతిలో కలిసేందుకు 2004లో ప్రభుత్వానికి లొంగిపోయాడు. ఆ తర్వాత తన స్వగ్రామంలోనే బతుకుతున్న సిద్దన్న తన ఓ యూ ట్యూబర్ కు ఇంటర్వ్యూ ఇచ్చాడు. తాను అప్పటి పీపుల్స్ వార్, ఇప్పటి మావోయిస్ట్ పార్టీలో పనిచేసిన సమయంలో ప్రజాకోర్టు నిర్వహించిన వీర్నపల్లికి చెందిన జక్కుల అంజయ్య అనే వ్యక్తిని ఎలా చంపాడో తన ఇంటర్వ్యూలో సిద్ధన్న పూసగుచ్చినట్లు వివరించాడు.
ఈ ఇంటర్వ్యూను చూసిన అంజయ్య కుమారుడు సంతోష్ రగిలిపోయాడు. తన తండ్రిని చంపింది ఇతనేనా? అని ఇంటర్వ్యూలో సిద్ధన్నను చూసిన సంతోష్ ప్రతీకారేచ్ఛకు సిద్ధమయ్యాడు. సిద్ధన్నతో పరిచయం పెంచుకుని, నమ్మించి అతన్ని ఈనెల 27న అగ్రహారం గుట్టల్లోకి తీసుకువెళ్లి దారుణంగా హత్య చేశాడు సంతోష్. కత్తిపోట్లతోపాటు ముఖంపై బండలు వేసి మరీ హతమర్చాడు. సిద్ధన్న ప్రాణాలు కోల్పోయిన తర్వాత సంతోష్ జగిత్యాల పోలీసులకు లొంగిపోయాడు. తన తండ్రి అంజయ్యను సిద్ధన్న 1999లో చంపగా, 26 ఏళ్ల తర్వాత సంతోష్ ప్రతీకారం తీర్చుకోవడానికి యూ ట్యూబ్ లో సిద్ధన్న ఇచ్చిన ఇంటర్వ్యూనే కారణమనే సారాంశంతో వార్తా కథనాలు వెలువడ్డాయి.
ఈ నేపథ్యంలో ప్రభుత్వానికి లొంగిపోయిన మాజీ నక్సలైట్లు కొందరు యూ ట్యూబ్ ఛానళ్లకు ఇంటర్వ్యూలు ఇస్తూ, బహిర్గతం చేస్తున్న ఘటనల పూర్వాపరాలు చర్చనీయాంశంగా మారుతున్నాయి. ‘మాజీ’ల ఇంటర్వ్యూలకు సంబంధించిన థంబ్ నెయిల్స్ ఎలా కనిపిస్తున్నాయంటే.. ఒకతను హిడ్మా తన శిష్యుడేనని చెబుతాడు. మరొకతను తాను ఐఏఎస్ అధికారులను ఎలా కిడ్నాప్ చేశానో వివరిస్తాడు. తాను పదేళ్లపాటు మావోయిస్టులతో తిరిగానని, తాను ఎంత మందిని చంపానోనని చెబుతాడు మరొక మాజీ. ఇదే కోవలో ఇంకో మాజీ నక్సల్ సైతం తాము ఐపీఎస్ అధికారి ఉమేష్ చంద్రను, మాజీ హోం మంత్రి ఎలిమినేటి మాధవరెడ్డిలను చంపడానికి ఎన్ని నెలలు ప్లాన్ చేశాం? వాళ్లను చంపడానికి కారణమేంటి? అనే అంశాలను వెల్లడిస్తాడు. ఇంకొకాయన సీనియర్ జర్నలిస్ట్ కమ్ మాజీ మావోయిస్టుగా తనను తాను కోట్ చేసుకుంటూ నక్సలైట్లు హత్యలు ఎలా చేస్తారో కూడా చెబుతాడు.
ఇవి కేవలం ఉదాహరణలు మాత్రమే. ఇంకొందరు మరో అడుగు ముందుకేసి అన్నలు ఏం తింటారు? కాపురాలు ఎక్కడ చేస్తారు? అనే అంశాలను ప్రస్తావిస్తాడు. హిడ్మా, నేను మంచి ఫ్రెండ్స్ తెలుసా? అని ప్రశ్నిస్తాడు ఇంకో మాజీ నక్సల్. విప్లవోద్యమంలో ఫ్రెండ్స్, శిష్యులనే పదాలను కొత్తగా తెరపైకి తీసుకువస్తున్నారు యూ ట్యూబ్ ఇంటర్వ్యూల్లో ‘మాజీ’లుగా చెప్పుకుంటున్న వ్యక్తులు కొందరు. ‘మాజీ’ల్లో వీళ్లు ఏ స్థాయి వాళ్లనే లోతైన చర్చలోకి వెళ్లకుండా అసలు పాయింట్ లోకి వస్తే.. చాలా మంది మాజీలు లొంగిపోయిన తర్వాత గమ్మున ఉండడం లేదు. యూ ట్యూబుల్లో ఇంటర్వ్యూల ‘స్టార్’లుగా బహుళ ప్రాచుర్యం పొందుతున్నారు. ఈ ఇంటర్వ్యూలకు కొన్నింటికి భారీ ఎత్తున వ్యూస్ ఉండగా, మరికొన్నింటికి పెద్దగా ప్రేక్షకాదరణ లేకపోవడం గమనార్హం.
వాస్తవానికి ఒకప్పటి పీపుల్స్ వార్ ఉద్యమంలో ప్రముఖ నాయకులుగా చరిత్రలో గల ముక్కు సుబ్బారెడ్డి, కేజీ సత్యమూర్తి వంటి నాయకులు కూడా జనజీవన స్రవంతిలో కలిశాక ఈ తరహా ఇంటర్వ్యూలు ఇచ్చిన దాఖలాలు లేవు. ఉమ్మడి వరంగల్ జిల్లాలో ఆర్కే సహచరి భారతక్క వంటి ముఖ్య నక్సల్ లీడర్లు కూడా ప్రసార మాధ్యమాలకు ఇంటర్వ్యూలు ఇస్తూ తాము అంత మందిని చంపామని, ఇంత మందికి స్కెచ్ గీశామని చెప్పిన ఉదంతాలు లేవు.
అనివార్యంగా ఏదేని పత్రికకుగాని, న్యూస్ ఛానల్ కు గానీ అప్పటి మాజీ నక్సల్ లీడర్లు ఇంటర్వ్యూ ఇచ్చినా, సాధారణంగా మాట్లాడినా అనవసరపు విషయాలను అసందర్భంగా వెల్లడించిన నేపథ్యం లేదు. జర్నలిస్ట్ ఎవరైన ఏదేని ముఖ్యాంశంపై ప్రశ్నించినా, అప్పుడున్న పరిస్థితుల్లో పార్టీ తీసుకున్న నిర్ణయం మాత్రమేనని చెప్పేవారు తప్ప, తమ హీరోయిజాన్ని వెలిబుచ్చే వ్యాఖ్యలేవీ చేసేవారు కాదు. అప్పట్లో లొంగిపోయిన చాలా మంది ప్రముఖ నక్సల్స్ మాజీలుగా ఇప్పుడు ఎక్కడ ఉంటున్నారు? ఎలా జీవిస్తున్నారనే అంశాలు సమాజానికి పెద్దగా తెలియదంటే ఆశ్చర్యం కాదు.
అంతెందుకు. అప్పటి ప్రముఖ మాజీలు మాత్రమే కాదు, కోవర్ట్ ఆపరేషన్లతో సంచలనం కలిగించిన కత్తుల సమ్మయ్య, జడల నాగరాజు, సోమ్లానాయక్ వంటి మాజీ నక్సల్స్ కూడా మీడియా సంస్థలకు ఈ తరహా ఇంటర్వ్యూలు ఇచ్చినట్లు లేదు. చివరికి గన్ మెన్లను పెట్టుకుని తిరిగినప్పటికీ కత్తుల సమ్మయ్య కొలంబో విమానాశ్రయంలో, సోమ్లానాయక్ సొంత గ్రామస్తుల చేతిలో తనువు చాలించారు. జడల నాగరాజు ఏమయ్యాడనేది ఇప్పటికీ అంతుబట్టని రహస్యమే.
కానీ ఇప్పుడు ట్రెండ్ మారింది? మాజీ నక్సల్స్ గా పేర్కొంటున్నవారు అనేక మంది ఏవేవో అంశాలు చెబుతున్నారు. చెబితే ఏమిటీ..? అనే ప్రశ్నకు వస్తే సిద్ధన్న హత్యోదంతాన్ని ప్రస్తావించకతప్పదు. ఉద్యమంలో ఉన్నపుడు జరిగిన ఘటనలను యూ ట్యూబర్ల ఇంటర్య్యూల్లో బహిర్గతం చేస్తే వీడియోలకు సంచలన స్థాయిలో వ్యూస్ రావచ్చు. దాని వల్ల యూ ట్యూబర్ కు కాసులు రాలవచ్చు. ఇంటర్వ్యూ ఇచ్చిన ‘మాజీ’లూ సమాజంలో బహుళ ప్రాచుర్యం పొందవచ్చు. కానీ సిద్ధన్న హత్యోదంతపు ఘటన చెబుతున్నదేమిటి? హత్యకు గురైన బాధిత కుటుంబాలకు వారసులు ఉండవచ్చు. వారిలో ప్రతీకారేచ్ఛ రగలవచ్చు. పలితమే సిద్ధన్న వంటి మాజీల జనజీవన స్రవంతి కథలో విషాదపు ముగింపు సీన్ కళ్లముందు కనిపించవచ్చు.
మొత్తంగా చెప్పొచ్చేదేమిటంటే..? ఉమేష్ చంద్రకూ వీరాభిమానులు ఉండవచ్చు. ఎలిమినేటి మాధవరెడ్డినీ అభిమానించేవాళ్లు ఉండవచ్చు. హయగ్రీవాచారికీ కార్యకర్తలు ఉండవచ్చు.. నక్సల్స్ చేతిలో హత్యలకు గురైన ఆయా నాయకుల, అధికారుల అభిమానుల్లో ఏ ఒక్కరికైనా సంతోష్ తరహాలో ఆగ్రహం కలిగినా, ప్రతీకార వాంఛ ఏర్పడినా యూ ట్యూబర్ కు గానీ, మీడియాకుగాని జరిగే నష్టం ఏమీ లేకపోవచ్చు. కానీ., ఏతావాతాగా నష్టపోయేది సంచలన ఘటనల పూర్వాపరాలను వెల్లడిస్తూ ‘హీరోయిజపు’ ఇంటర్వ్యూలు ఇస్తున్న ‘మాజీ’లు మాత్రమే అనేది నిర్వివాదాంశమే కాదు, సిద్ధన్న మర్డరే ఇందుకు ప్రబల నిదర్శనం.
✍ ఎడమ సమ్మిరెడ్డి
