హైదరాబాద్: ప్రముఖ రచయిత అందెశ్రీ (64) ఇక లేరు. సోమవారం ఉదయం ఆయన ఆకస్మికంగా కన్నుమూశారు. లాలాగూడలోని తన నివాసంలో ఉన్నట్టుండి ఒక్కసారిగా కుప్పకూలిన అందెశ్రీని ఆయన కుటుంబం గాంధీ ఆసుపత్రికి తరలించినప్పటికీ ప్రయోజనం లేకపోయింది. ఈ ఉదయం 7.25 గంటలకు అందెశ్రీ కన్నుమూసినట్లు వైద్యులు ప్రకటించారు. అందెశ్రీకి ముగ్గురు కుమార్తెలు, ఓ కుమారుడు ఉన్నారు.
సిద్ధిపేట జిల్లా రేకుర్తిలో 1961 జూలై 18వ తేదీన జన్మించిన అందెశ్రీ గొర్రెల కాపరిగా జీవితాన్ని ప్రారంభించారు. ఆ తర్వా భవన నిర్మాణ పనుల్లో కూలీగానూ పని చేశారు. పాఠశాల చదువు లేకుండానే అందెశ్రీ కవిగా రాణించడం విశేషం. ‘మాయమైపోతున్నడమ్మా మనిషన్నవాడు’ అనే గీతంతో అందెశ్రీ ప్రముఖంగా పేరుగాంచారు. కాకతీయ విశ్వవిద్యాలయం నుంచి గౌరవ డాక్టరేట్ పురస్కారాన్ని అందుకున్న అందెశ్రీ తెలంగాణా ఉద్యమంలో కీలక పాత్ర పోషించారు. ‘జయ జయహే తెలంగాణ’ గేయం ప్రత్యేక రాష్ట్ర ఉద్యమంలో ఉర్రూతలూగించింది. కాంగ్రెస్ ప్రభుత్వం అధికారంలోకి వచ్చాక ఈ గేయాన్ని రాష్ట్ర గీతికగా ప్రకటించింది. రాష్ట్ర ప్రభుత్వం ఇటీవలే అందెశ్రీకి రూ. కోటి పురస్కారాన్ని గౌరవ పురస్కారంగా అందించింది.
అందెశ్రీ అసలు పేరు అందె ఎల్లయ్య. అశువు కవిత్వం చెప్పడంలో అందెశ్రీ దిట్టగా ప్రాచుర్యం పొందారు. గంగ సినిమా ద్వారా 2006లో అందెశ్రీ నంది పురస్కారాన్ని అందుకున్నారు. అదేవిధంగా 2014లో అకాడమీ ఆఫ్ యూనివర్సల్ గ్లోబల్ పీస్ డాక్టరేట్, 2015లో దాశరథి సాహితీ, 2015లో రావూరి భరద్వాజ సాహితీ, 2022లో అందెశ్రీకి జానకమ్మ జాతీయ, 2024లో దాశరథీ కృష్ణమాచార్య సాహితీ, లోక్‌ నాయక్‌ పురస్కారాలను అందుకున్నారు. అందెశ్రీ ఆకస్మిక మరణం పట్ల తెలంగాణా సీఎం రేవంత్ రెడ్డి, మాజీ సీఎం కేసీఆర్ దిగ్భ్రాంతిని వ్యక్తం చేశారు. అందెశ్రీతో తమకు గల అనుబంధాన్ని గుర్తు చేసుకున్నారు. కాగా అందెశ్రీకి అధికార లాంఛనాలతో అంత్యక్రియలు జరపాలని సీఎం రేవంత్ రెడ్డి ఆదేశించారు. ఇందుకు ఏర్పాట్లు చేయాలని ఆయన అధికారులను పురమాయించారు.
