హైదరాబాద్: తుపాకులు ధరించిన గన్ మెన్లను వెంటేసుకుని ఐఏఎస్, ఐపీఎస్ అధికారిగా చెప్పుకుంటూ వసూళ్ల దందాకు పాల్పడుతున్న ఓ వ్యక్తిని హైదరాబాద్ ఫిలింనగర్ పోలీసులు బుధవారం అరెస్ట్ చేశారు. షేక్ పేటకు చెందిన ఓ జిమ్ నిర్వాహకుడు ఇచ్చిన ఫిర్యాదు మేరకు నకిలీ ఐఏఎస్/ఐపీఎస్ అధికారి బత్తుల శశికాంత్ ను అరెస్ట్ చేసిన వెస్ట్ జోన్ డీసీపీ శ్రీనివాస్ మీడియాకు చెప్పారు.
వెస్ట్ జోన్ డీసీపీ శ్రీనివాస్ కథనం ప్రకారం.. ఏపీలోని నందికొట్కూరుకు చెందిన శశికాంత్ చంపాపేటలో ఉండేవాడు. తుపాకులు ధరించిన ఇద్దరు గన్ మెన్లను తన వెంట తిప్పుకుంటూ ఐఏఎస్/ఐపీఎస్ అధికారిగా చెలామణి అయ్యాడు. షేక్ పేటలోని ఓ అపార్టుమెంట్ లోకి ఇటీవలే మకాం మార్చిన శశికాంత్ ఐఏఎస్/ఐపీఎస్ నకిలీ ఐడీ కార్డులను తయారు చేసుకున్నాడు. పోలీసు శాఖలోనేగాక, ఎన్ఐఏ వింగ్ లో స్పెషల్ ఆపరేషన్ల కోసం తనను ప్రభుత్వం ప్రత్యేకంగా నియమించినట్లు పలువురిని నమ్మించాడు.
ఇందులో భాగంగానే తుపాకులను ధరించిన ఇద్దరు గన్ మెన్లను వెంటేసుకుని షేక్ పేటలోని జిమ్ కు నిత్యం వెళ్లేవాడు. ఎక్సర్ సైజ్ చేస్తున్న సమయంలో తన మొబైల్ రింగ్ అయితే స్పెషల్ ఆపరేషన్ కోసం వెడుతున్నట్లు శశికాంత్ హడావిడి చేసేవాడు. వెంటనే జిమ్ నుంచి వేగంగా బయటకు వెళ్లేవాడు.
ఈ నేపథ్యంలోనే తాను తెలంగాణా ఐఐసీలో డీడీ (డిప్యూటీ డైరెక్టర్)గా పనిచేస్తున్నాని, ఖాళీ స్థలాలు కేటాయించే సెక్షన్ లో స్పెషల్ ఆఫీసర్ నని జిమ్ నిర్వాహకుడు ఆలీ హసన్ ను నమ్మించాడు. ఇండస్ట్రీ ఏర్పాటుకు సైట్ అలాట్మెంట్ జరిగిందని నమ్మించి అతని వద్ద రూ. 10.50 లక్షలు తీసుకున్నాడు. జిమ్ కు వచ్చే మరో వ్యక్తిని కూడా ఇదే విధంగా నమ్మించి రూ. 10.00 లక్షలు వసూల్ చేశాడు.
అయితే ఇండస్ట్రీ ఏర్పాటు కోసం తనకు కేటాయించినట్లు పేర్కొన్న స్థలానికి సంబంధించి శశికాంత్ ఇచ్చిన ఆర్డర్ నకిలీదని తేలడంతో ఆలీ హసన్ ఫిలిం నగర్ పోలీసులకు అతనిపై ఫిర్యాదు చేశాడు. దీంతో కేసు నమోదు చేసిన పోలీసులు బత్తుల శశికాంత్ ను అరెస్ట్ చేశారు. ఇతని వద్ద నుంచి రెండు సెల్ ఫోన్లను, వాకీ టాకీలను, నకిలీ ఐడీ కార్డులను స్వాధీనం చేసుకున్నారు.
శశికాంత్ కు గన్ మెన్లుగా ఉన్నటువంటి వ్యక్తులను ప్రవీన్, విమల్ అనే వ్యక్తులుగా, ఈ ఇద్దరు రిటైర్డ్ సీఆర్పీఎఫ్ జవాన్లుగా పోలీసులు గుర్తించారు. తమిళనాడుకు చెందిన ఈ ఇద్దరినీ అరెస్ట్ చేయాల్సి ఉందని డీసీపీ చెప్పారు. శశికాంత్ కు గన్ మెన్లుగా వ్యవహరించిన ఇద్దరు సీఆర్పీఎఫ్ రిటైర్డ్ జవాన్లు పర్సనల్ ప్రొటెక్షన్ కోసం గన్ లైసెన్స్ తీసుకున్నట్లు చెప్పారు. పర్సనల్ ప్రొటెక్షన్ కోసం గన్ లైసెన్స్ తీసుకుని ఉద్యోగాలు చేయడం నేరమని, ఆ ఇద్దరు గన్ మెన్ల తుపాకులను సీజ్ చేస్తామని, గన్ లైసెన్స్ ను కూడా రద్దు చేస్తామని వెస్ట్ జోన్ డీసీపీ శ్రీనివాస్ మీడియాకు వివరించారు.
