శాంతి భద్రతల పరిరక్షణ అంశంలో తెలంగాణా పోలీస్ యంత్రాంగానికి డీజీపీ శివధర్ రెడ్డి క్లియర్ ‘ఇండికేషన్’ ఇచ్చారు. సరిగ్గా ఇరవై రోజుల క్రితం రాష్ట్ర డీజీపీగా పదవీ బాధ్యతలు స్వీకరించిన సందర్భంగా ఆయన చేసిన కీలక వ్యాఖ్యలు గుర్తంచుకున్నవారికి ఈ ఇండికేషన్ ఏమిటో ఈపాటికి బోధపడే ఉంటుంది. విపక్ష పార్టీకి చెందిన నాయకులు పేర్కొంటున్న ‘పింక్ బుక్’ గురించి ఓ విలేకరి అడిగిన ప్రశ్నకు శివధర్ రెడ్డి అక్టోబర్ 1వ తేదీన క్లారిటీగానే సమాధానం ఇచ్చారు. తమకు రెడ్, వైట్, పింక్ తదితర ఏ కలర్ బుక్కుల గురించి తెలియదని, తమకు తెలిసింది ‘ఖాకీ బుక్’ మాత్రమేనని చెప్పారు. ఖాకీ బుక్ అంటే IPC, CRPC మాత్రమేనని, ఆయా చట్టాల్లోని సెక్షన్లను అమలు చేయడమే ‘ఖాకీ బుక్’గా డీజీపీ నిర్వచించారు.
నిజామాబాద్ నగరంలో గత శుక్రవారం చోటు చేసుకున్న కానిస్టేబుల్ ప్రమోద్ దారుణ హత్యపై డీజీపీ శివధర్ రెడ్డి తీవ్రంగానే స్పందించారు. కరడుగట్టిన నేరస్థుడు రియాజ్ చేతిలో ఓ పోలీస్ ప్రాణాలు కోల్పోవడాన్ని ఆయన సీరియస్ గానే తీసుకున్నారు. కత్తిపోట్లకు గురై ప్రాణాలు పోతున్న పరిస్థితుల్లో విలవిలలాడుతున్న కానిస్టేబుల్ ప్రమోద్ కు సాయం చేయని మానవత్వపు తీరుపై పోలీసు శాఖ తీవ్ర ఆవేదన చెందింది. అరగంట సేపు ఎస్ఐ బతిలాడినా ప్రమోద్ ను కాపాడేందుకు ఎవరూ ముందుకు రాలేదనే వార్తా కథనాలు వచ్చాయి. ఘటనా స్థలంలో జనం సహాయ నిరాకరణ చేసిన పరిస్థితులపై స్థానిక అధికారులు సైతం కలత చెందారు. తాము ఎవరి కోసం పనిచేస్తున్నామని బాహాటంగానే మథనపడ్డారు.
మొత్తంగా రియాజ్ దురాగతాన్ని పోలీస్ శాఖ సీరియస్ గానే తీసుకుంది. మల్టీ జోన్ ఐజీ చంద్రశేఖర్ రెడ్డిని ఉన్నఫలంగా నిజామాబాద్ కు వెళ్లాలని డీజీపీ స్వయంగా ఆదేశించారు. రియాజ్ ను పట్టుకునేందుకు స్పెషల్ టీంను రంగంలోకి దించారు. ఎట్టకేలకు రియాజ్ ఆచూకీ తెలిసింది. నిజామాబాద్ ఆరో టౌన్ పోలీస్ స్టేషన్ పరిధిలోని సారంగాపూర్ వద్ద ఓ షెడ్డులో తలదాచుకున్న రియాజ్ ను పట్టుకునేందుకు పోలీసులు వెళ్లారు. ఇక్కడా రియాజ్ మరోసారి తెగబడ్డాడు. ఇతన్ని పట్టుకునే విషయంలో పోలీసులకు సహకరించిన ఆసిఫ్ అనే వ్యక్తిని సైతం తీవ్రంగా గాయపర్చాడు. మొత్తంగా రియాజ్ ను రౌండప్ చేసిన పోలీసులు ఆదివారం అతన్ని అరెస్ట్ చేశారు. ఆసిఫ్ తో జరిగిన పెనుగులాటలో తీవ్రంగా గాయపడిన రియాజ్ ను చికిత్స కోసం పోలీసులు ఆసుపత్రికి తరలించారు.
తనను అరెస్ట్ చేసే సమయంలో., నిన్నటి పెనుగులాట ఘటనలో తీవ్రంగా గాయపడిన రియాజ్ తెగింపు ఆసుపత్రిలోనూ కొనసాగడం గమనార్హం. డీజీపీ శివధర్ రెడ్డి చెప్పిన ప్రకారం.. నిజామాబాద్ ప్రభుత్వ ఆసుపత్రిలో రియాజ్ మరోసారి పోలీసుల మీద దాడి చేసి పారిపోవడానికి ప్రయత్నించాడు. రియాజ్ ను పట్టుకొనేందుకు పోలీసులు తీవ్ర ప్రయత్నం చేశారు. పోలీసుల దగ్గరున్న తుపాకీని గుంజుకుని కాల్పులు జరిపే ప్రయత్నం చేశాడు. రియాజ్ ను నిలువరించడానికి పోలీసులు జరిపిన ప్రయత్నంలో అతను చనిపోయాడు. పారిపోయేందుకు ప్రయత్నించడం, తుపాకీ లాక్కోవడం వంటి పరిణామాల్లో పోలీసులు అప్రమత్తం కాకపోయి ఉంటే ఆసుపత్రిలోని చాలా మందికి అపాయం జరిగేదని డీజీపీ పేర్కొన్నారు. ఈ క్రమంలోనే ఆత్మరక్షణ కోసం జరిపిన కాల్పుల్లో రియాజ్ హతమైనట్లు శివధర్ రెడ్డి వివరించారు.
రియాజ్ ఎన్కౌంటర్ పరిణామాల అనంతరం డీజీపీ శివధర్ రెడ్డి ఓ కీలక ప్రకటన విడుదల చేశారు. తెలంగాణలో లా అండ్ ఆర్డర్ ను పూర్తి స్థాయిలో కాపాడేందుకు పోలీసు శాఖ నిబద్దతతో ఉందన్నారు. ఎలాంటి తీవ్ర నేరస్తులనైనా కఠినంగా అణచివేస్తామని స్పష్టం చేశారు. ఇదే సందర్భంలో దారుణ హత్యకు గురైన కానిస్టేబుల్ ప్రమోద్ కుటుంబానికి అండగా ఉంటూ, చేయగలిగే సాయాన్నీ ప్రకటించారు. కోటి రూపాయల ఎక్స్ గ్రేషియాతోపాటు. అమరుడైన కానిస్టేబుల్ ప్రమోద్ పదవీ విరమణ వరకు లాస్ట్ పే డ్రాన్ సాలరీని అందిస్తామన్నారు. అతని కుటుంబ సభ్యులలో ఒకరికి ప్రభుత్వ ఉద్యోగం, 300 గజాల ఇంటి స్థలం, పోలీస్ భద్రత సంక్షేమం నుండి 16 లక్షలు, పోలీస్ వెల్ఫేర్ నుండి 8 లక్షల రూపాయల ఎక్స్ గ్రేషియాగా అందిస్తామని, తద్వారా ప్రమోద్ కుటుంబానికి అండగా ఉంటామని చెప్పారు.
మొత్తంగా అక్టోబర్ 21వ తేదీన పోలీసు అమరవీరుల సంస్మరణ దినం కార్యక్రమ నిర్వహణకు ముందు చోటు చేసుకున్న కానిస్టేబుల్ ప్రమోద్ హత్య, కరడుగట్టిన నేరస్థుడు రియాజ్ ఎన్కౌంటర్ పరిణామాలు డీజీపీ శివధర్ రెడ్డి ‘మార్క్’ అడ్మినిస్ట్రేషన్ పై పోలీసు యంత్రాంగానికి ఓ క్లారిటీ ఇచ్చినట్లయిందనే వ్యాఖ్యలు ఈ సందర్భంగా వినిపిస్తున్నాయి. పదవీ బాధ్యతల స్వీకరణ రోజున శివధర్ రెడ్డి చెప్పిన ‘ఖాకీ బుక్’ అమలుకే తెలంగాణా పోలీసులు సంసిద్ధం కావలసి ఉందనే సంకేతాలు వెలువడినట్లుగా పరిశీలకులు తాజా ఘటన నేపథ్యంలో అంచనా వేస్తున్నారు. కాగా రియాజ్ ఎన్కౌంటర్ ఘటన తర్వాత నిజామాబాద్ ప్రభుత్వాసుపత్రి ముందు కొందరు టపాసులు కాల్చి ‘దీపావళి’ జరుపుకోవడం గమనార్హం. అంతేకాదు డీజీపీ శివధర్ రెడ్డిపై సోషల్ మీడియాలో ప్రశంసల వర్షం కురుస్తోంది. ఇన్నాళ్లకు తెలంగాణా పోలీస్ శాఖకు సరైన మగాడు వచ్చాడనే వ్యాఖ్యకు డీజీపీ ఫొటోను జతచేసి నెటిజన్లు కొనియాడుతుండడం విశేషం.
✍ ఎడమ సమ్మిరెడ్డి
