తెలంగాణా మంత్రివర్గం తాజాగా పలు కీలక నిర్ణయాలు తీసుకుంది. ఇందులో భాగంగానే ముఖ్యమంత్రి రేవంత్ రెడ్డి అధ్యక్షతన డాక్టర్ బీఆర్ అంబేద్కర్ రాష్ట్ర సచివాలయంలో గురువారం రాత్రి వరకు జరిగిన కేబినెట్ సమావేశంలో సంక్షేమం, అభివృద్ధికి సంబంధించి అనేక కీలక నిర్ణయాలు తీసుకున్నారు. డిప్యూటీ సీఎం మల్లు భట్టివిక్రమార్క, రెవెన్యూ, సమాచార శాఖ మంత్రి పొంగులేటి శ్రీనివాస రెడ్డిలు మంత్రివర్గ సమావేశంలో తీసుకున్న తాజా నిర్ణయాలను మీడియాకు వెల్లడించారు. కేబినెట్ నిర్ణయాల్లో ప్రధాన అంశాలు:
ప్రభుత్వ ఉద్యోగులకు రెండు డీఏలు చెల్లించాలని కేబినెట్ నిర్ణయించింది. ఒక డీఏను తక్షణమే చెల్లిస్తారు. మరో డీఏను ఆరు నెలల తర్వాత చెల్లిస్తారు. ఉద్యోగుల రిటైర్మెంట్ బెనిఫిట్స్‌కు సంబంధించి గత ప్రభుత్వ హయాంలో పెండింగ్‌లో ఉన్న బకాయిలను ప్రతి నెల కనీసం ₹ 700 కోట్ల చొప్పున చెల్లించి క్లియర్ చేయాలని నిర్ణయించారు. ఉద్యోగుల ఆరోగ్య అవసరాల కోసం రాష్ట్ర ప్రభుత్వ ప్రధాన కార్యదర్శి చైర్మన్‌గా హెల్త్‌కేర్ ట్రస్ట్ ఏర్పాటు చేయనున్నారు.
అదేవిధంగా కేడర్ ర్యాంక్ ప్రకారం గ్రామ పంచాయతీ సెక్రటరీలకు గ్రేడింగ్, క్రమం తప్పకుండా డీపీసీ ప్రమోషన్లు, జిల్లా స్థాయిలో మెడికల్ ఇన్వాలిడేషన్ కమిటీల ఏర్పాటు, కొత్తగా నర్సింగ్ డైరెక్టరేట్ ఏర్పాటు, అంగన్‌వాడీ వర్కర్లకు ₹2 లక్షల వరకు రిటైర్మెంట్ బెనిఫిట్స్, ఇకపై రిటైర్డ్ ఉద్యోగుల రీ-రిక్రూట్‌మెంట్ చేయరాదని నిర్ణయం తీసుకున్నారు.
భద్రాద్రి కొత్తగూడెంలో ఇప్పటికే ఏర్పాటు చేసిన ఎర్త్ సైన్సెస్ యూనివర్సిటీకి దివంగత మాజీ ప్రధాని డా. మన్మోహన్ సింగ్ గారి పేరు పెట్టాలని నిర్ణయం తీసుకున్నారు.
ప్రమాదవశాత్తు మరణించిన మహిళా స్వయం సహాయక సంఘాల సభ్యులకు బీమా పాలసీ లేకున్నా ప్రభుత్వం నుంచి నేరుగా ₹ 10 లక్షల పరిహారం అందజేస్తారు. గత ఏడాది 385 మంది మృతులైన వారికి ₹38.5 కోట్ల పరిహారం చెల్లింపునకు కేబినెట్ ఆమోదం తెలిపింది.
రాష్ట్ర వ్యాప్తంగా R&B, పంచాయతీ రాజ్ విభాగాల కింద మొత్తం 13,000 కిలోమీటర్ల రహదారుల అభివృద్ధిని చేపట్టాలని నిర్ణయం తీసుకున్నారు.
హైదరాబాద్ మెట్రో రెండో దశ విస్తరణకు సంబంధించి మొత్తం 86 కి.మీ పొడవైన మార్గాన్ని ₹19,579 కోట్లతో నిర్మించేందుకు కేంద్ర ప్రభుత్వానికి ప్రతిపాదనలు పంపాలని కేబినెట్ నిర్ణయించింది.
