హైదరాబాద్: చాదర్ ఘాట్ విక్టోరియా ప్లే గ్రౌండ్ వద్ద శనివారం సాయంత్రం జరిగిన కాల్పుల ఘటనపై హైదరాబాద్ పోలీస్ కమిషనర్ వీసీ సజ్జన్నార్ క్లారిటీ ఇచ్చారు. ఈమేరకు ఆయన మీడియాతో మాట్లాడుతూ, ఆత్మరక్షణలో భాగంగానే డీసీపీ చైతన్య దొంగలపై కాల్పులు జరిపినట్లు చెప్పారు. ఈరోజు సాయంత్రం 5.00 గంటలకు చాదర ఘాట్ విక్టోరియా ప్లేగ్రౌండ్ వద్ద ఘటన జరిగిందని, రౌడీ షీటర్, మొబైల్స్ స్నాచర్స్ ఇద్దరూ స్నాచింగ్ చేస్తుండగా డీసీపీ చైతన్య పట్టుకునే ప్రయత్నం చేశారని చెప్పారు. ఇందులో భాగంానే దొంగను వెంబడిస్తూ డీసీపీ తన గన్ మెన్ తో వచ్చారన్నారు. అయితే దొంగ గన్ మెన్ పై కత్తితో దాడి చేశాడని, దీంతో ఆత్మరక్షణలో భాగంగా డీసీపీ చైతన్య రెండు రౌండ్లు కాల్పులు జరపగా, దొంగ చేతిపై, కడుపులో గాయాలైనట్లు చెప్పారు.
గాయపడిన దొంగను మలక్ పేటలోని ప్రయివేట్ ఆసుపత్రికి తరలించామని, పరారీలో ఉన్న మరో దొంగ కోసం గాలిస్తున్నట్లు చెప్పారు. కత్తితో దాడికి ప్రయత్నించిన రౌడీ షీటర్ మహ్మద్ ఉమర్ అన్సారీపై 20కి పైగా కేసులు ఉన్నాయని, రెండు పీడీ యాక్టులు కూడా నమోదై ఉన్నాయని, రెండేళ్లపాటు జైలులో ఉన్నాడని సీపీ సజ్జన్నార్ వివరించారు. రౌడీ షీటర్ మహ్మద్ ఉమర్ అన్సారీకి సహకరిస్తున్నవారిని గుర్తిస్తామని, అతని నేరాలపై, నమోదైన కేసులపై పూర్తి సమాచారం సేకరిస్తున్నట్లు చెప్పారు. రౌడీషీటర్లను ఉపేక్షించే ప్రసక్తే లేదని, రౌడీలపై, స్నాచర్లపై ఉక్కుపాదం మోపుతామని సజ్జన్నార్ ఈ సందర్బంగా ప్రకటించారు. కాగా ఈ ఘటనలో డీసీపీ చైతన్య స్వల్ప అస్వస్థతకు గురయ్యారని, గాయపడిన కానిస్టేుబుల్ సహా ఇద్దరూ ఆసుపత్రిలో క్షేమంగా ఉన్నట్లు సీపీ సజ్జన్నార్ తెలిపారు.
