హైదరాబాద్: బీఆర్ఎస్ చీఫ్ కేసీఆర్ క్రియాశీల రాజకీయాల్లో లేరని తెలంగాణా సీఎం రేవంత్ రెడ్డి వ్యాఖ్యానించారు. కేసీఆర్ ను తప్పించి ఆ కుర్చీని గుంజుకోవాలని హరీష్, కేటీఆర్ పోటీ పడుతున్నారని చెప్పారు. ఓసారి వాళ్లకు (కేటీఆర్, హరీష్ రావులకు) అవకాశం ఇస్తే వాళ్ల పరిస్థితి ఏమిటనేది వాళ్లకు అర్థం కావాలని కేసీఆర్ జూబ్లీ హిల్స్ ఎన్నికల అంశంలో మౌనంగా ఉన్నట్లు తాను అనుకుంటున్నానని రేవంత్ అన్నారు.
‘కేసీఆర్ గారు క్రియాశీలక రాజకీయాల్లో లేరు, వారి ఆరోగ్యం కూడా అంతంతగానే ఉంది. క్రియాశీలక రాజకీయాల్లో లేకుండా, ఆరోగ్యం అంతంత మాత్రంగానే ఉన్న ఒక నాయకున్ని విమర్శించడం భావ్యం కాదని నేను భావిస్తున్నా, కేసీఆర్ గారు క్రియాశీల రాజకీయాల్లోకి వచ్చినపుడు తప్పకుండా వారి పట్ల నేను స్పందిస్తాను’ అని రేవంత్ రెడ్డి వ్యాఖ్యానించారు. జూబ్లీ హిల్స్ ఉప ఎన్నికల ఫలితం వెలువడిన అనంతరం సీఎం రేవంత్ మీడియాతో మాట్లాడారు.
స్థానిక సంస్థల ఎన్నికల నిర్వహణపై మంత్రి వర్గంలో చర్చిస్తామని చెప్పారు.ఈనెల 17వ తేదీన కేబినెట్ మీటింగ్ ఉందని, స్థానిక సంస్థల ఎన్నికలకు సంబంధించి మంత్రుల అభిప్రాయాలు స్వీకరించిన తర్వాత ఉన్న పరిణామాలు, న్యాయస్థానాల్లో గల అంశాలను ఓ పరిగణనలోకి తీసుకున్న తర్వాత ఓ నిర్ణయానికి వస్తామని సీఎం చెప్పారు.జూబ్లీహిల్స్‌ ఉప ఎన్నికల్లో కాంగ్రెస్ విజయం తమ బాధ్యతను మరింత పెంచిందని సీఎం అన్నారు. అసెంబ్లీ ఎన్నికల తర్వాత హైదరాబాద్ ప్రజల్లో కాంగ్రెస్‌పై నమ్మకం పెరుగుతోందని చెప్పారు.
వాస్తవానికి గత అసెంబ్లీ ఎన్నికల్లో హైదరాబాద్‌లో కాంగ్రెస్‌కు సరైన ఫలితాలు రాలేదన్నారు. అయితే కాంగ్రెస్ ప్రభుత్వం రెండేళ్ల పాలనను ప్రజలు నిశితంగా పరిశీలించి తాజా తీర్పు ఇచ్చారని సీఎం అన్నారు. జూబ్లీహిల్స్‌ ఎన్నికల్లో విజయం అందించిన నియోజకవర్గ ప్రజలకు ఈ సందర్బంగా సీఎం రేవంత్ ధన్యవాదాలు తెలిపారు. అదేవిధంగా పార్టీ అభ్యర్థి నవీన్ యాదవ్ విజయం కోసం కృషి చేసిన పార్టీ శ్రేణులకు కృతజ్ఞతలు తెలిపారు.
కాగా బీఆర్ఎస్ నాయకులు కేటీఆర్ అహంకారం తగ్గించుకోవాలన్నారు. హరీష్ రావు అసూయతో ఉన్నారన్నారు. పదవులు ఎవరికీ శాశ్వతం కాదని, డబ్బులిచ్చి ఫేక్ న్యూస్ లు రాయించుకుని, ఫేక్ సర్వేలతో భ్రమల్లో బతకవద్దని కేటీఆర్ ను ఉద్ధేశించి సీఎం వ్యాఖ్యానించారు. జూబ్లీ హిల్స్ లో బీఆర్ఎస్ ఓడిపోతుందని, బీజేపీకి డిపాజిట్ దక్కదని తాను ముందే చెప్పానని గుర్తు చేశారు. వచ్చే పదేళ్లపాటు కాంగ్రెస్ రాష్ట్రంలో పాలన చేస్తుందన్నారు.
విలేకరుల సమావేశంలో డిప్యూటీ సీఎం భట్టి విక్రమార్క, మంత్రులు పొంగులేటి శ్రీనివాసరెడ్డి, పొన్నం ప్రభాకర్, వాకిటి శ్రీహరి సీతక్క ఉత్తమ్ కుమార్ రెడ్డి కోమటిరెడ్డి వెంకటరెడ్డి, వివేక్, పీసీసీ చీఫ్ మహేష్ కుమార్ గౌడ్, జూబ్లీ హిల్స్ నుంచి విజయం సాధించిన ఎమ్మెల్యే నవీన్ యాదవ్ తదితరులు పాల్గొన్నారు.
