తెలంగాణా సీఎం రేవంత్ రెడ్డి సన్నబియ్యం లబ్ధిదారుని ఇంట్లో ఆదివారం భోజనం చేశారు. శ్రీరామ నవమి సందర్భంగా భద్రాచలం వచ్చిన సీఎం రేవంత్ రాములవారి కళ్యాణంలో పాల్గొన్న అనంతరం బూర్గంపాడు మండలం సారపాకలో సన్నబియ్యం లబ్దిదారుడు బూరం శ్రీనివాస్ ఇంట్లో సన్న బియ్యపు అన్నం తిన్నారు. రాష్ట్రంలోని ప్రతీ నిరుపేద సన్నబియ్యంతో అన్నం తినాలనే లక్ష్యంతోనే ప్రభుత్వం ప్రతిష్టాత్మకంగా సన్నబియ్యం పంపిణీ పథకాన్ని ప్రారంభించిన సంగతి తెలిసిందే. ఈ నేపథ్యంలో ఓ లబ్దిదారుడి ఇంట్లో ఆ కుటుంబ సభ్యులతో కలిసి ముఖ్యమంత్రి రేవంత్ రెడ్డి సహఫంక్తి భోజనం చేశారు.
ఈ సందర్భంగా ముఖ్యమంత్రి లబ్ధిదారుడి కుటుంబ యోగక్షేమాలను అడిగి తెలుసుకున్నారు. సన్నబియ్యం ఎలా ఉన్నాయంటూ కుటుంబ సభ్యురాలు తులిశమ్మను వివరాలు అడిగారు. దొడ్డు బియ్యం పంపిణీ చేసినపుడు అసలు వాటిని తీసుకునేందుకే ఆసక్తి చూపేవాళ్లం కాదని చెప్పిన తులిశమ్మ, ఇప్పుడు సన్నబియ్యం ఇవ్వడంతో కుటుంబానికి ఉపయోగంగా ఉంటుందని సంతోషం వ్యక్తం చేశారు. అదేవిధంగా 200 యూనిట్స్ వరకు ఉచిత కరెంట్, రూ.500 గ్యాస్ సిలిండర్ వంటి పథకాలు అందుతున్నాయా? అని సంక్షేమ పథకాల గురించి ముఖ్యమంత్రి వారి నుంచి ఆరా తీశారు. ఉచిత బస్సు సౌకర్యం కల్పించడం వల్ల తమకు ఎంతో ఉపయోగపడుతుందని తులిశమ్మ ఆనందం వ్యక్తం చేశారు.
సీఎం రేవంత్ తో కలిసి డిప్యూటీ సీఎం మల్లు భట్టి విక్రమార్క, మంత్రులు పొంగులేటి శ్రీనివాసరెడ్డి, తుమ్మల నాగేశ్వరరావు, కొండా సురేఖ, ప్రభుత్వ ప్రధాన కార్యదర్శి శాంతి కుమారి తదితరులు కూడా సహఫంక్తి భోజనంలో పాల్గొన్నారు.
