మోసాలకు పాల్పడుతున్న రియల్ ఎస్టేట్ వ్యాపారులపై ఖమ్మం పోలీసుల శాఖ కేసుల నమోదు పరంపర కొనసాగుతోంది. ఇందులో భాగంగానే తాజాగా మంగళవారం మరో ముగ్గురు రియల్టర్లపై కేసు నమోదు చేసినట్లు పోలీస్ కమిషనర్ సునీల్ దత్ తెలిపారు. రియల్ ఎస్టేట్ ముసుగులో అక్రమాలకు పాల్పడుతూ అమాయకుల నుండి లక్షల రూపాయల దోచుకుంటున్న రియల్ ఎస్టేట్ వ్యాపారులపై సీసీఎస్ పోలీస్ స్టేషన్ లో కేసు నమోదు చేసినట్లు ఆయన తెలిపారు. గడచిన పక్షం రోజుల్లో ఖమ్మం పోలీసులు ఇప్పటికే నలుగురు రియల్టర్లపై ఇదే తరహా కేసులను నమోదు చేయడం గమనార్హం.
ఖమ్మం సీపీ సునీల్ దత్ కథనం ప్రకారం.. ఖమ్మం ఆర్బన్ మండలం అగ్రహారం ప్రాంతంలోని సర్వే నెంబరు 42/E,42/EE లో తమకు సంబంధం లేని పలు ప్లాట్లపై ముగ్గురు రియల్టర్లు తప్పుడు డాక్యుమెంట్స్ సృష్టించి, పలువురికి విక్రయించి, మోసం చేశారు. ఇందుకు పాల్పడిన ఖమ్మం రూరల్ మండలం నాయుడుపేటకు చెందిన మానుకొండ శ్రీనివాస్, ఖమ్మం టౌన్ కు చెందిన తల్లాపల్లి రాజగిరి, నగరంలోని శ్రీనివాసనగర్ చెందిన సిలివెరూ రవిలపై కేసు నమోదు చేశారు.
ఈ ముగ్గురు కలసి 5 లక్షల రూపాయల వరకు మోసం చేసినట్లు, అదేవిధంగా మరో ఇద్దరు నుండి రూ. 25 లక్షల వరకు తీసుకొని మోసం చేశారని పోలీసుల దర్యాప్తులో తేలింది. ఖమ్మం పార్శీబంధం ప్రాంతానికి చెందిన వినుకొండ మరియన్న ఫిర్యాదు మేరకు సీసీఎస్ పోలీస్ స్టేషన్ లో కేసు నమోదు చేసినట్లు సీపీ చెప్పారు.
ముఖ్యంగా భూములు, ప్లాట్లు కొనుగోలు చేసే ముందు సంబంధిత పత్రాలు సక్రమంగా ఉన్నదీ, లేనిదీ క్షేత్రస్దాయిలోకి వెళ్లి పరిశీలించుకోవాలని సీపీ సునీల్ దత్ ఈ సందర్భంగా సూచించారు. ఇటీవల కొందరు రియల్ ఎస్టేట్ వ్యాపారులు లేదా భూమి యాజమానులు ప్లాట్ల అభివృద్ధి పేరుతో ఫైనాన్షియర్ల నుండి డబ్బు తీసుకుని ఫైనాన్షియర్లకు రిజిస్ట్రేషన్ చేస్తున్నారని చెప్పారు. అదే ప్లాట్లను మరొకరికి జీపీఏ చేసి డబ్బులు తీసుకొని రిజిస్ట్రేషన్ చేయకుండా మోసం చేస్తున్నట్లు పలు ఫిర్యాదులు వస్తున్నాయని సీపీ సునీల్ దత్ వివరించారు.
