ఈనెల 27వ తేదీన జరిగే ఉపాధ్యాయ ఎమ్మెల్సీ ఎన్నికలకు ఖమ్మం జిల్లాలో అన్ని ఏర్పాట్లు పూర్తయ్యాయి. టీచర్స్ ఎమ్మెల్సీ ఎన్నికల పోలింగ్ కోసం జిల్లా వ్యాప్తంగా 24 పోలింగ్ కేంద్రాలను సిద్ధం చేశారు. జిల్లాలో మొత్తం 4,089 మంది ఉపాధ్యాయ ఓటర్లు ఉన్నారు. ఎన్నికలు సజావుగా జరిగేందుకు 9 సెక్టార్ అధికారులు, 28 ప్రిసైడింగ్ అధికారులు, 27 అసిస్టెంట్ ప్రిసైడింగ్ అధికారులు, 58 ఇతర పోలింగ్ సిబ్బంది, 28 మంది మైక్రో అబ్జర్వర్లను నియమించారు.
జిల్లా కలెక్టరేట్ లో డిస్ట్రిబ్యూషన్ కేంద్రం ఏర్పాటు చేశారు. బుధవారం ఇక్కడి నుండి ఎన్నికల విధుల సిబ్బంది పోలింగ్ సామాగ్రితో పాటు పోలింగ్ కేంద్రాలకు వెళ్లనున్నారు. ఎన్నికల తర్వాత పోలింగ్ కేంద్రాల నుంచి నేరుగా నల్గొండ లోని రిసెప్షన్ కేంద్రాలకు బ్యాలెట్ బాక్సులు చేరుకుంటాయని జిల్లా కలెక్టర్ ముజమ్మిల్ ఖాన్ తెలిపారు.
మొత్తం 8 రూట్లలో పోలింగ్ కేంద్రాలకు పోలింగ్ సిబ్బంది సామాగ్రిని తరలిస్తున్నారని, వీటి కోసం 8 ఆర్టీసీ బస్సులను సన్నద్ధం చేశామన్నారు. ఈనెల 27న ఉదయం 8.00 గంటల నుంచి సాయంత్రం 4.00 గంటల వరకు పోలింగ్ జరుగుతుందని, ప్రతి ఓటరు ప్రజాస్వామ్య ప్రక్రియలో పాల్గొని తమ ఓటు హక్కును సక్రమంగా వినియోగించుకోవాలని జిల్లా కలెక్టర్ కోరారు.
