రంపచోడవరం: మోస్ట్ వాంటెడ్ మావోయిస్ట్ లీడర్, ఆ పార్టీ కేంద్ర కమిటీ సభ్యుడు మడివి హిడ్మా, అతని భార్య రాజే సహా ఆరుగురు మావోయిస్టుల ఎన్కౌంటర్ కు దారి తీసిన పరిస్థితులను ఏపీ ఇంటెలిజెన్స్ అదనపు డీజీ మహేష్ చంద్ర లడ్హా విలేకరులకు వివరించారు. ఈమేరకు ఆయన అల్లూరి జిల్లా ఎస్పీ అమిత్ బర్దర్, వోఎస్డి పంకజ్ కుమార్ మీనాలతో కలిసి మీడియాతో మాట్లాడారు. మంగళవారం ఉదయం 6:30 గంటల నుండి 7:00 గంటల మధ్య మారేడుమిల్లి మండల అటవీ ప్రాంతంలో మావోయిస్టులు, పోలీసు పార్టీ మధ్య ఎదురుకాల్పులు జరిగినట్లు చెప్పారు. ఈ సంఘటనలో ఆరుగురు మావోయిస్టులు చనిపోయారని తెలిపారు.
ఛత్తీస్ గఢ్ లో తీవ్ర వ్యతిరేక పరిస్థితుల నేపథ్యంలో సిటీల్లో షెల్టర్ తీసుకునేందుకు కొందరు, అడవుల్లోనే ఉండి పార్టీ కార్యకలాపాలను కొనసాగించేందుకు మరికొందరు ఏపీ రాష్ట్రం వైపు వచ్చారన్నారు. ఈ అంశంలో మావోయిస్టుల కదలికలపై ఇంటెలిజెన్స్ సమాచారం మేరకు పోలీసుల బలగాలు నిఘా ఏర్పాటు చేశాయన్నారు. ఈ నేపథ్యంలోనే మారేడుమిల్లి అడవుల్లో పోలీసులతో జరిగిన ఎన్కౌంటర్ లో పార్టీ కేంద్ర కమిటీ సభ్యుడు, ఒకటో బెటాలియణ్ కమాండెంట్ హిడ్మా, అతని భార్య రాజే అలియాస్ రాజక్క, ఇతర మావోయిస్టులు దేవే, లక్మల్ అలియాస్ చైతు, మల్ల అలియాస్ మల్లాలు, కమ్లు అలియాస్ కమ్లేష్ మృతి చెందినట్లు ఏడీజీ లడ్డా తెలిపారు.
ఘటనా స్థలంలో రెండు ఏకే-47, ఒక్కొక్కటి చొప్పున పిస్టల్, రివాల్వర్, సింగిల్ బోర్ తుపాకీ, పలు ఆయుధాల తూటాలను, డిటొనేటర్లు, కిట్ బ్యాగులు తదితర సామాగ్రిని స్వాధీనం చేసుకున్నట్లు చెప్పారు. ఎన్కౌంటర్ జరిగిన ప్రాంతంలో తప్పించుకున్న మరికొందరు నక్సలైట్ల కోసం గాలింపు చర్యలు కొనసాగుతున్నట్లు చెప్పారు. కాగా ఇదే రోజు ఏపీ రాష్ట్ర వ్యాప్తంగా 31 మంది నక్సలైట్లను విజయవాడ, కాకినాడ నగరాల్లో అరెస్ట్ చేసినట్లు ఇంటెలిజెన్స్ ఏడీజీ మహేష్ చంద్ర లడ్హా ప్రకటించారు.
