భద్రాచలం: నెయ్యి ఎలా తయారవుతుంది..? పాల నుంచి తీసిన మీగడను కవ్వంతో చిలికితే వెన్న తయారవుతుంది. ఆ వెన్నను కాచితే నెయ్యి తయారవుతుంది. ఇదీ నెయ్యి తయారీ ప్రక్రియ. కానీ భద్రాచలంలోని లాడ్జీల్లో నెయ్యి ఎలా తయారవుతుందో తెలుసా? డాల్డా, పామాయిల్, చాక్లెట్ కలిపిన పాల పౌడర్, బిర్యానీలో వాడే యెల్లో కలర్ ద్వారా. నమ్మడం లేదా? భద్రాచలం పోలీసులు ఓ లాడ్జీలో ఇదే తరహాలో తయారవుతున్న కల్తీ నెయ్యి డబ్బాలను స్వాధీనం చేసుకున్నారు.
భద్రాచలంలోని శ్రీరామ లాడ్జిలో ఆంధ్రప్రదేశ్, కర్నాటకకు చెందిన మల్లిఖార్జున, కె. శ్రీనివాస్, షిఖరేశ్వర, మల్లిఖార్జున్ అనే నలుగురు వ్యక్తులు కల్తీ నెయ్యి తయారు చేస్తూ పోలీసులకు పట్టుబడ్డారు. వీరి వద్ద నుంచి రూ. 52 వేల విలువైన 65 కిలోల కల్తీ నెయ్యితోపాటు, దీని తయారీకి ఉపయోగించే పరికరాలను, వస్తువులను స్వాధీనం చేసుకున్నారు. నిందితులను భద్రాచలం పోలీసులు అరెస్ట్ చేశారు.
