ఇల్లెందు: రేషన్ షాపు డీలర్ నుంచి మధ్యవర్తి ద్వారా లంచం తీసుకుంటుండగా పౌరసరఫరాల శాఖకు చెందిన డిప్యూటీ తహశీల్దార్ సహా ముగ్గురిని అవినీతి నిరోధక శాఖ అధికారులు అరెస్ట్ చేశారు. ఈ ఘటన సోమవారం భద్రాద్రి కొత్తగూడెం జిల్లా ఇల్లెందు పట్టణంలో సంచలనం కలిగించింది.
ఏసీబీ డీఎస్పీ వై. రమేష్ వెల్లడించిన వివరాల ప్రకారం.. ఇల్లెందు నియోజకవర్గంలోని టేకులపల్లి మండంలోని ఓ రేషన్ షాపును సివిల్ సప్లయిస్ డిప్యూటీ తహశీల్దార్ మహ్మద్ యాకూబ్ పాషా ఈనెల 7వ తేదీన తనిఖీ చేసి, స్టాక్ షార్టేజీ ఉందనే కారణంతో సీజ్ చేశారు. రేషన్ షాపును యథావిధిగా నడుపుకునేందుకు సంబంధిత డీలర్ నుంచి రూ. 30 వేల నగదును లంచంగా సివిల్ సప్లయిస్ టీడీ పాషా, టెక్నికల్ అసిస్టెంట్ విజయ్ ద్వారా రేషన్ డీలర్ ను డిమాండ్ చేశారు. తాను పేదరాలినని, డబ్బు ఇచ్చుకోలేనని రేషన్ షాపు మహిళా డీలర్ ప్రాధేయపడుతుంది. అయినప్పటికీ వినకుండా డబ్బు ఇవ్వాల్సిందేనని డీటీ పాషా డిమాండ్ చేస్తాడు. ఇదే విషయంపై రేషన్ షాపునకు చెందిన మహిళా డీలర్ ఏసీబీ అధికారులకు సమాచారం అందించారు.
ఈ నేపథ్యంలోనే జరిగిన బేర సారాలకు సంబంధించిన ఫోన్ సంభాషణలను ఏసీబీ అధికారులు సాంకేతికంగా సేకరించారు. సివిల్ సప్లయస్ డిప్యూటీ తహశీల్దార్ యాకూబ్ పాషా, టెక్నికల్ అసిస్టెంట్ విజయ్, మహిళా రేషన్ డీలర్ మధ్య లంచం మొత్తానికి సంబంధించి ఫోన్ సంభాషణ జరిగినట్లు సమాచారం. అయితే డబ్బులు ఎవరికి అప్పగించాలని మహిళా డీలర్ ప్రశ్నించగా, డీలర్స్ అసోసియేషన్ ఇల్లెందు మండల అధ్యక్షుడు శబరీష్ కు ఇవ్వాలని సివిల్ సప్లయిస్ టెక్నికల్ అసిస్టెంట్ విజయ్ ఆమెతో చెప్పారు.
దీంతో రేషన్ షాపు మహిళా డీలర్ రూ. 30 వేల మొత్తాన్ని శబరీష్ కు ముట్టజెప్పారు. ఆ మొత్తాన్ని ఇల్లెందులోని జగదాంబ సెంటర్ లో గల ఓ సెల్ పాయిట్ వద్ద సివిల్ సప్లయిస్ టెక్నికల్ అసిస్టెంట్ విజయ్ కు రేషన్ డీలర్ల సంఘం అధ్యక్షుడు శబరీష్ అందిస్తుండగా ఏసీబీ అధికారులు వలపన్ని పట్టుకున్నారు. ఈ ఘటనతో సంబంధం గల సివిల్ సప్లయిస్ డిప్యూటీ తహశీల్దార్ యాకూబ్ పాషాను, టెక్నికల్ అసిస్టెంట్ విజయ్ ను ఏసీబీ అధికారులు అరెస్ట్ చేశారు. వీరిద్దరినేగాక రూ. 30 వేల లంచాన్ని విజయ్ కు ముట్టజెప్పేందుకు ప్రయత్నించిన రేషన్ డీలర్ల సంఘం నాయకుడు శబరీష్ ను కూడా ఏసీబీ అధికారులు అరెస్ట్ చేయడం గమనార్హం.
కాగా తమకు పట్టుబడిన డీటీ పాషాపై గతంలోనూ లంచం కేసు నమోదై ఉందని డీఎస్పీ రమేష్ చెప్పారు. ఆ కేసు ప్రస్తుతం విచారణలో ఉందని, యాకూబ్ పాషాపై పలు ఆరోపణలు ఉన్నట్లు కూడా చెప్పారు.
