హైదరాబాద్: ఇద్దరు రాష్ట్ర కమిటీ సభ్యులు సహా 37 మంది మావోయిస్ట్ పార్టీ నక్సలైట్లు తెలంగాణా డీజీపీ బి. శివధర్ రెడ్డి ఎదుట శనివారం లొంగిపోయారు. లొంగిపోయిన వారిలో రాష్ట్ర కమిటీ సభ్యులు కొయ్యడ సాంబయ్య అలియాస్ ఆజాద్, అప్పాసి నారాయణ అలియాస్ రమేష్ లు కూడా ఉన్నారు. ఎనిమిది తుపాకులను కూడా పోలీసులకు అప్పగిస్తూ మావోయిస్టులు లొంగిపోవడం విశేషం. వీటిలో ఒక ఏకే-47, రెండు ఎస్ఎల్ఆర్ లు, నాలుగు 303, ఒక జీ3 తుపాకులు ఉన్నాయి.
ప్రభుత్వానికి లొంగిపోయిన 37 మంది నక్సలైట్లపై రూ. 1.41 కోట్ల మొత్తం నగదు రివార్డు ఉన్నట్లు డీజీపీ శివధర్ రెడ్డి మీడియా సమావేశంలో చెప్పారు. సీఎం రేవంత్ రెడ్డి ఇచ్చిన పిలుపు మేరకు వీరంతా జనజీవన స్రవంతిలో కలిశారని, మరో 59 మంది తెలంగాణాకు చెందిన నక్సలైట్లు ఇంకా అజ్ఞాతంలో ఉన్నట్లు చెప్పారు. లొంగిపోయిన మొత్తం 37 మందిలో ముగ్గురు మినహా మిగతా 34 మంది ఛత్తీస్ గఢ్ కు చెందినవారేనని డీజీపీ వివరించారు.
తెలంగాణాకే చెందిన ముప్పాళ్ల లక్ష్మణ్ రావు అలియాస్ గణపతి, తిప్పిరి తిరుపతి అలియాస్ దేవ్ జీ, మల్లా రాజిరెడ్డి అలియస్ సంగ్రామ్, బడే చొక్కారావు అలియాస్ దామోదర్ వంటి ముఖ్య నేతలు కూడా లొంగిపోవాలని డీజీపీ శివధర్ రెడ్డి ఈ సందర్భంగా సూచించారు.
